博客西藏在最高处过一种生活

日志

༄༅།།བོད་ཀྱི་མཚོ་ཆེན་བཞི།

已有 44 次阅读2021-4-5 18:46 |系统分类:文化


                                                    ༄༅།།བོད་ཀྱི་མཚོ་ཆེན་བཞི།

                                             རྩོམ་ཁུངས། ཁམས་པའི་དྲ་བ། རྩོམ་པ་པོ། མི་གསལ།


                      

                                                       ཡར་འབྲོག་གཡུ་མཚོ།

      བོད་ལྗོངས་ཡོངས་སུ་གྲགས་པའི་མཚོ་ཆེན་བཞིའི་ནང་གསེས་ཡར་འབྲོག་ཆུ་གཏེར་ཆེན་པོའམ་ཡར་འབྲོག་གཡུ་མཚོར་འབོད་པ་ནི། བོད་རང་སྐྱོང་ལྗོངས་ཀྱི་ལྷོ་ཕྱོགས་ཏེ་ཡར་ཀླུང་གཙང་པོའི་ལྷོ་རྒྱུད་ཀྱི་སྣ་དཀར་རྩེ་རྫོང་གི་བྱང་ཕྱོགས་སུ་ཆགས་ཡོད་ཅིང་ལྷ་ས་ནས་བར་ཐག་སྤྱི་ལེ༡༥༠ཙམ་ཡོད། མཚོ་འདིའི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ༦༧༨ཡོད་ཅིང་། མཚོ་ངོས་ཀྱི་མཐོ་ཚད་ལ་མཚོ་འཕགས་སྨི༤༤༤༡དང་གཏིང་ཚད་ཆེས་ཟབ་སར་སྨི༥༩ཙམ་ཡོད།  མཚོ་འདིའི་བྱང་ངོས་དོག་ལ་ལྷོ་ངོས་ཡངས་པ་དང་མཚོ་ནང་ན་གླིང་ཕྲན་ཆེ་ཆུང་བཅུ་ཐམ་པ་ཡོད། གླིང་ཕྲན་དེ་དག་གི་སྟེང་དུ་རྩྭ་ཆུ་ཤིན་ཏུ་འཛོམས་པས་ཡུལ་དེའི་འབྲོག་མི་ཚོས་དབྱར་དུས་སུ་ཕྱུགས་ཟོག་ཀོ་གྲུས་བསྐྱལ་ནས་གླིང་ཕྲན་དེ་དག་ཏུ་འཚོ་བཞིན་ཡོད།


                      

                                                       གནམ་མཚོ་ཕྱུག་མོ།

     མཚོ་ཆེན་གནམ་མཚོ་ཕྱུག་མོ་ནི་ལྷ་ས་གྲོང་ཁྱེར་འདམ་གཞུང་རྫོང་གི་ནུབ་ཕྱོགས་སུ་གནམ་སྔོན་ཐང་ལ་ལྷུང་འདྲའི་ཚུལ་དུ་ཡོད་ཅིང་མིང་གཞན་ལ་གནམ་མཚོ་ཡང་ཟེར། ལྷ་ས་དང་བར་ཐག་སྤྱི་ལེ༢༣༠ཙམ་ཡོད་ལ་ཚང་མ་སྣུམ་ལམ་ཡིན་པས་འགྲོ་བདེ་པོ་ཡོད། མཚོ་དེའི་སྤྱིའི་རྒྱ་ཁྱོན་སྤྱི་ལེ་གྲུ་བཞི་མ༡༩༩༣ཙམ་ཡོད་ཅིང་། རྟ་ཞོན་ནས་དལ་འགྲོས་ཀྱིས་མཚོ་ལ་སྐོར་བ་ཕྱིན་ན་ཉིན་བཅུ་གཅིག་ལ་འཁོར་ཟེར་སྲོལ་ཡོད། མཚོ་ངོས་ཀྱི་མཐོ་ཚད་ལ་མཚོ་འཕགས་སྨི༤༧༡༨དང་གཏིང་ཚད་ཆེས་ཟབ་སར༡༢༠ལས་བརྒལ་ཡོད། མཚོ་འདིའི་དབྱིབས་ནི་མཚོ་མགོ་ནུབ་ཕྱོགས་སུ་ཡོད་པ་དེ་རྒྱ་ཆེ་ཞིང་། མཚོ་མཇུག་ཤར་ཕྱོགས་སུ་ཡོད་པ་ནི་རྒྱ་ཆུང་བ་ཐུར་མའི་དབྱིབས་དང་འདྲ་བ་ཞིག་ཡིན།


                      

                                                         མ་ཕམ་གཡུ་མཚོ།

     མཚོ་མ་དྲོས་པ་སྟེ་ཡོངས་གྲགས་སུ་མཚོ་མ་ཕམ་ཞེས་འབོད་པ་དེ་ནི་བོད་ལྗོངས་མངའ་རིས་ས་ཁུལ་སྤུ་ཧྲེང་རྫོང་གི་ཤར་དུ་སྤྱི་ལེ༣༥ཡི་སར་ཡོད་ཅིང་། གཡུ་མཚོ་ཞེས་འབོད་དོན་ནི་མཚོའི་མདོག་ལ་བརྟེན་ནས་བཏགས་པ་ཡིན། མཚོ་འདིའི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ༤༡༢ཡོད་ཅིང་མཚོ་ངོས་ཀྱི་མཐོ་ཚད་ལ་མཚོ་འཕགས་སྨི༤༥༨༨ཡོད། ཆ་སྙོམས་གཏིང་ཚད་ལ་སྨི༤༦དང་གཏིང་ཚད་ཟབ་ཤོས་ལ་སྨི༨༡.༨ཙམ་ཡོད། ༼མངོན་པ་མཛོད།༽ལས། དེ་ལས་འབབ་པའི་ཆུ་བོ་བཞི།། གངྒཱ་དང་ནི་སིན་དྷུ་དང་།། སི་ཏ་དང་ནི་པཀྵུའོ།། ཞེས་གསུངས་པ་ལྟར་དེའི་ཕྱོགས་བཞི་ནས་ཆུ་བོ་ཆེན་པོ་བཞི་འབབ་པར་གྲགས་ལ། མཚོ་འདིའི་གཡས་འགྲམ་ན་འཛམ་བུ་ཏྲི་ཥའི་སྡོང་བོ་ཡོད་པར་གྲགས་པ་སོགས་ངོ་མཚར་ཤིན་ཏུ་ཆེ།


                      

                                                         མཚོ་སྔོན་པོ།

     མཚོ་ཆེན་ཁྲི་ཤོར་རྒྱལ་མོའམ་མཚོ་སྔོན་པོ་ནི་མདོ་དབུས་མཐོ་སྒང་གི་བྱང་ཤར་ཁུལ་ཏེ་ཟི་ལིང་གྲོང་ཁྱེར་གྱི་ནུབ་བྱང་མཚམས་སུ་སྤྱི་ལེ༡༥༠ལྷག་གི་སར་ཡོད། སོག་སྐད་དུ་ཁུ་ཁུ་ནོའར་དང་གནའ་དུས་རྒྱའི་ཡིག་ཚགས་ནང་ཞི་ཧའེ་ཞེས་བཀོད་འདུག། མཚོ་འདིའི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ༤༣༣༧.༤༨ཙམ་ཡོད་ཅིང་མཚོ་ངོས་ཀྱི་མཐོ་ཚད་ལ་མཚོ་འཕགས་སྨི༣༡༩༠ལྷག་ཡོད། གཏིང་ཚད་ཟབ་ཤོས་ལ་སྨི༣༢.༨ཙམ་ཡོད་དེ་མཚོ་འདི་ནི་རང་རྒྱལ་སྐམ་སའི་ཐོག་ཏུ་ཡོད་པའི་ཚྭ་མཚོ་ཆེ་ཤོས་ཤིག་ཡིན། མཚོ་ནང་དུ་མཚོ་སྙིང་རི་དང་མཚོ་མགོའི་གླིང་ཕྲན། མཚོ་མཇུག་གི་མཚེར་པ་རི། འདྲེ་མོ་བྲག་དཀར། འདབ་ཆགས་གླིང་བཅས་གླིང་ཕྲན་ལྔ་ཡོད་པ་དང་། དེའི་ནང་ནས་མཚོ་སྙིང་རི་བོ་ནི་ཆེ་ཤོས་ཡིན།

     ཞེས་རོང་ཆེན་ལྷ་རྒྱལ་དཔལ་གྱིས་ཁམས་པའི་དྲ་བ་ལས་བཏུས་སོ།



评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所|技术支持:BODYIG.NET

严禁在本站发表与国家法律相抵触言论和散播谣言

Powered by Discuz! X3.4GMT+8, 2021-4-21 10:51 , Processed in 0.031674 second(s), 16 queries .

返回顶部