日志

༄༅།།རྗེ་བཙུན་ལམ་རིམ་པ་ངག་དབང་ཕུན་ཚོགས་ཀྱ ...

热度 1已有 51 次阅读2020-6-24 09:54


                    ༄༅།།རྗེ་བཙུན་ལམ་རིམ་པ་ངག་དབང་ཕུན་ཚོགས་ཀྱི་རང་སེམས་ཆོས་ལ་བསྐུལ་བའི་བཀའ་སློབ་བཞུགས་སོ།
                                     ཡོང་ཁུངས། མདོ་ལྷོ་དྲ་བ། རྩོམ་སྒྲིག་པ། བདེ་ལེགས་མཚོ། 

                  
                                ༧ཀུན་གཟིགས་སྣང་བ་མཐའ་ཡས་པཎ་ཆེན་སྐུ་ཕྲེང་བཅུ་བ་བློ་བཟང་ལྷུན་གྲུབ་ཆོས་ཀྱི་རྒྱལ་མཚན་མཆོག་ལ་ན་མོ།

     ༄༅།།གང་མཚན་ལན་གཅིག་རྣ་བར་ལྷུང་བས་ཀྱང་།། སྲིད་ཞིའི་དབུལ་བ་སེལ་དང་ཆབས་ཅིག་པར།། ཅི་འདོད་རེ་བ་སྐོང་བ་ཡིད་བཞིན་ནོར།། བླ་མ་མཆོག་གསུམ་གཙུག་གི་རྒྱན་དུ་རོལ།། གྲོགས་དག་འདི་ཕྱི་གཏན་དུ་བདེ་འདོད་ཅིང་།། སྡུག་མི་འདོད་ན་ཆོས་བཞིན་བྱ་དགོས་པས།། ཇི་ལྟར་བྱ་ཚུལ་མདོར་བསྡུས་གོ་བདེ་བར།། ཚིག་འགའ་གསོལ་ལ་ཅུང་ཟད་སྙན་གཏོད་ཅིག། ནད་པ་དག་གིས་སྨན་པ་འཚོལ་བ་བཞིན།། ཐོག་མར་ཚད་ལྡན་བཤེས་གཉེན་དམ་པ་ཞིག། བཙལ་ནས་བསམ་སྦྱོར་གཉིས་ཀྱིས་ཚུལ་བཞིན་དུ།། བསྟེན་ནས་གདམས་པ་ལོངས་ཤིག་སྙིང་གཏམ་ཡིན།། ཐོག་མེད་དུས་ནས་དམྱལ་བ་ཡི་དྭགས་སོགས།། མི་ཁོམ་གནས་སུ་སྡོད་དགོས་བྱུང་མོད་ཀྱི།། ད་རེས་དེ་ནས་ཡུད་ཙམ་ཐར་བ་འདི།། རྨི་ལམ་ལྟ་བུ་ཡིན་ནོ་སྙིང་གཏམ་ཡིན།། རྙེད་དཀའི་མི་ལུས་ལན་ཅིག་རྙེད་དུས་འདིར།། སྙིང་ནས་བསྒྲིམས་ཏེ་སྙིང་པོ་མ་བླངས་ན།། སླར་ཡང་ངན་སོང་གནས་དེར་ལྷུངས་པའི་ཚེ།། འགྱོད་ཀྱང་འཕྱིས་པར་ཟད་དོ་སྙིང་གཏམ་ཡིན།། ཤིན་ཏུ་དབུལ་བའི་མི་ཞིག་གསེར་གླིང་དུ།། ཡུད་ཙམ་ཚུད་ན་ནོར་བུ་ཅིས་མི་ལེན།། དེ་བཞིན་བདག་འདྲས་དལ་འབྱོར་ཐོབ་དུས་འདིར།། དེ་བས་སྙིང་པོ་བླང་དགོས་སྙིང་གཏམ་ཡིན།། དལ་འབྱོར་ཐོབ་ཀྱང་དོན་མེད་རྣམ་གཡེང་ངང་།། མི་ཚེ་འདས་ན་དབུལ་པོས་གསེར་གླིང་ནས།། ལག་སྟོང་ལྡོག་པ་ལས་ཀྱང་ཆེས་ཕངས་པས།། རང་ལྕག་རང་ལ་བྲོབས་ཤིག་སྙིང་གཏམ་ཡིན།། དོན་ཆེན་གཏན་བདེ་སྒྲུབ་ནུས་རྟེན་བཟང་འདི།། དོན་མེད་འདི་སྣང་ལས་ལ་ཆུད་གསན་ན།། མི་རུ་རློམ་ཡང་དོན་དུ་བྱོལ་སོང་དང་།། ཁྱད་པར་ཅི་ཡང་མེད་དོ་སྙིང་གཏམ་ཡིན།། སྐྱེས་པའི་ནམ་གཞུག་འཆི་ལས་མ་འདས་ཤིང་།། འཆི་ཚེ་ཆོས་ལས་གཞན་གྱིས་མི་ཕན་པས།། ཕན་ངེས་ཆོས་ཤིག་ཉི་མ་དེ་རིང་ནས།། གང་ནུས་ཅི་ཡོང་སྒྲུབས་དང་སྙིང་གཏམ་ཡིན།། ཐ་ན་དེ་རིང་ཙམ་ཡང་མི་འཆི་བའི།། གདེང་ཚོད་ཅུང་ཟད་ཙམ་ཡང་མེད་བཞིན་དུ།། ད་དུང་སྡོད་གཤོམ་ཁོ་ནས་དུས་འདའ་བ།། མི་ཁྱོད་སྨྱོན་བ་མིན་ནམ་སྙིང་གཏམ་ཡིན།། ཚེ་འདིའི་གཅེས་ནོར་ཕ་མ་སྤུན་མཆེད་སོགས།། ཡིད་ལ་གཅགས་ཀྱང་རིང་མིན་དབང་མེད་དུ།། བཞག་ནས་རང་ཉིད་གཅིག་པུར་འགྲོ་དགོས་པས།། འགྲོ་ཆས་ལ་འུར་སྡོགས་དང་སྙིང་གཏམ་ཡིན།། རང་རེས་མཐོང་བའི་སྐྱེ་བོ་ཇི་སྙེད་ཅིག། ཤི་ནས་ད་ལྟ་གར་སོང་ཆ་མེད་ཐལ།། རང་ཡང་རིང་མིན་དེ་ལྟར་ཐལ་བས་ན།། ཚེ་འདིར་ཆགས་ནས་ཅི་བྱེད་སྙིང་གཏམ་ཡིན།། ཉེས་ཅན་གསོད་སར་བཀྲི་བའི་བར་སྐབས་དེར།། ནོར་བུ་རྙེད་ཀྱང་དགོས་རྒྱུ་མ་མཆིས་ལྟར།། མི་ཚེ་ཡུད་ཀྱིས་སོང་བའི་བར་སྐབས་འདིར།། ཅིས་ཀྱང་དགོས་པ་མེད་དོ་སྙིང་གཏམ་ཡིན།། ཕྱི་ནས་འོང་རྒྱུ་མི་རྟག་འཆི་བའི་ཚུལ།། སྔོན་ནས་བསམས་ཏེ་འཆི་གྲབས་མ་བྱས་ན།། དུས་ལ་གཏུགས་ཚེ་ཅི་བགྱིར་མ་མཆིས་པས།། རྗེས་ཡོང་སྔོན་ལ་སོམས་དང་སྙིང་གཏམ་ཡིན།། སྙིང་པོ་མེད་པའི་འདི་སྣང་བྱ་བ་ལས།། སྙིང་པོར་རློམས་ཏེ་མགོ་བོ་འཁོར་འཁོར་ནས།། སྙིང་པོའི་ལྷ་ཆོས་སྣེ་གཅིག་མི་བྱེད་ན།། སྙིང་རྩ་རུལ་བར་ངེས་སོ་སྙིང་གཏམ་ཡིན།། ཚེ་འདིར་ཇི་ལྟར་རིང་ཡང་ལོ་འགའ་ཙམ།། ཕྱི་མ་ཕན་གྱི་མཐའ་ལ་གཏུགས་དུས་མེད།། དེ་ཕྱིར་འདི་ལས་ཕྱི་མ་གལ་ཆེ་བས།། ཕྱི་མའི་དོན་ལ་འབུངས་ཤིག་སྙིང་གཏམ་ཡིན།། མི་ཚེ་གང་པོ་སྐྱིད་ན་ཉིན་གཅིག་ཙམ།། དཀའ་བ་སྤྱད་དགོས་བྱུང་ཡང་ཅི་མི་བཟོད།། དེ་བཞིན་གཏན་དུ་སྐྱིད་ན་ཚེ་ཐུང་འདིར།། ཆོས་ཕྱིར་སྡུག་ཀྱང་ལོས་བཟོད་སྙིང་གཏམ་ཡིན།། ཉིན་གཅིག་བདེ་ལ་ཆགས་ནས་མི་ཚེའི་རིང་།། སྡུག་ལ་སྦྱོར་ན་ཤིན་ཏུ་བླུན་པ་སྟེ།། ཚེ་འདིར་ཆགས་ནས་གཏན་དུ་སྡུག་བསྔལ་ལ།། སྦྱོར་བ་དེ་བས་བླུན་ནོ་སྙིང་གཏམ་ཡིན།། ད་ལྟ་མཐོ་ཡིས་སླེབ་དུ་མ་འབད་ན།། ནམ་ཞིག་འདོམ་གྱིས་མི་འཁྱུད་དུས་བྱུང་ཚེ།། འགྱོད་ཀྱང་ཕན་པ་མེད་པས་བྱ་དགོས་རྣམས།། ད་ལྟ་ཉིད་ནས་བྱོས་དང་སྙིང་གཏམ་ཡིན།། ཕྱི་མར་ཕན་པའི་ཆོས་ཤིག་བྱེད་འདོད་ཀྱང་།། ཕར་ཙམ་མི་འཆི་སྙམ་པའི་རྟག་འཛིན་འདིས།། བསླུས་ནས་ལག་སྟོང་ལྡོག་པ་ཆེས་མང་བས།། བྱེད་ན་འཕྲལ་ལ་བྱོས་དང་སྙིང་གཏམ་ཡིན།། འདི་ནས་ངན་འགྲོར་ལན་ཅིག་ལྷུངས་གྱུར་ན།། སླན་ཆད་ཐར་པའི་གོ་སྐབས་མ་མཆིས་པས།། ད་ལྟ་རང་ལག་ཡོད་དུས་ངན་སོང་གི། སྐྱེ་སྒོ་ཅི་ཆོད་ལྟོས་དང་སྙིང་གཏམ་ཡིན།། བརྒྱ་ལ་ངན་སོང་སྡུག་བསྔལ་མི་བཟོད་ན།། དེ་རྒྱུ་སྔར་བསགས་གང་ཡིན་འདག་ངེས་སུ།། སྦྱོངས་ལ་ཕྱིན་ཆད་མི་བྱེད་སྡོམ་སེམས་ངོས།། སྤང་བླང་འཛོལ་མེད་གྱིས་དང་སྙིང་གཏམ་ཡིན།། རྒྱུས་མེད་ཡུལ་དུ་གྲོགས་མེད་འཁྱམ་པའི་ཚེ།། ཚེ་འདིའི་གཉེན་བཤེས་ལོངས་སྤྱོད་ཀུན་གྱིས་བསླུ།། བསླུ་བ་མེད་པ་དཀོན་མཆོག་རིན་ཆེན་གསུམ།། གསུམ་ལ་སྐྱབས་སུ་འཚོལ་དང་སྙིང་གཏམ་ཡིན།། ཕར་ལ་བསྐྱབས་ན་ཚུར་ལ་མི་བསླུ་བ།། དཀོན་མཆོག་གསུམ་འདྲ་གཞན་དུ་ཡོད་མིན་པས།། དོན་མེད་མི་ལ་རེ་བ་མ་ཆེས་པར།། ལྷ་ལ་སྐྱབས་སུ་སོང་དང་སྙིང་གཏམ་ཡིན།། སྐྱོན་ཟད་ཡོན་ཏན་ཀུན་རྫོགས་ཐུགས་རྗེའི་སྤྱན།། གཟིགས་པ་དུ་ལས་མི་ཡོལ་སངས་རྒྱས་ལ།། ཡིད་ཆེས་དད་པ་དྲག་པོའི་ངང་ཉིད་ནས།། བློ་ཕུག་ལིངས་ཀྱིས་འགེལ་དང་སྙིང་གཏམ་ཡིན།། སྐྱབས་སུ་གསོལ་ན་མི་མཁྱེན་མི་སྲིད་ཅིང་།། མཁྱེན་ནས་མི་སྐྱོབ་པ་ཡང་མི་སྲིད་ལ།། བསྐྱབས་ན་མི་ནུས་པ་ཡང་མི་སྲིད་པས།། རྩེ་གཅིག་སྐྱབས་སུ་གསོལ་དང་སྙིང་གཏམ་ཡིན།། ཆོས་ཞེས་བྱ་བ་རྣམ་གྲངས་མང་མོད་ཀྱང་།། སྐྱབས་འགྲོར་མ་འདུས་གང་ཡང་ཡོད་མིན་པས།། བརྒྱ་གོ་གཅིག་ཆོད་སྐྱབས་འགྲོའི་ཉམས་ལེན་ལ།། ནན་ཏན་སྙིང་པོར་མཛོད་དང་སྙིང་གཏམ་ཡིན།། གང་དང་གང་གི་ས་བོན་བཏབ་པ་ལས།། དེ་དང་དེ་ཡི་འབྲས་བུ་འབྱུང་བ་བཞིན།། དཀར་ནག་ལས་འབྲས་ནམ་ཡང་མི་བསླུ་བས།། སྡིག་སྤོང་དགེ་བ་སྒྲུབས་དང་སྙིང་གཏམ་ཡིན།། བདེ་བ་འདོད་ན་དགེ་ལ་ནན་ཏན་སྐྱེད།། སྡུག་མི་འདོད་ན་དེ་རྒྱུ་སྡིག་པ་སྤོངས།། སངས་རྒྱས་དངོས་ལ་ཞུས་ཀྱང་འདི་ལས་ལྷག། གདམས་པ་གསུང་རྒྱུ་མེད་དོ་སྙིང་གཏམ་ཡིན།། ལས་འབྲས་བསླུ་མེད་ཚུལ་ལ་ཡིད་ཆེས་ནས།། སྡིག་སྤོང་དགེ་བ་བསྒྲུབ་ལ་འབད་ནུས་ན།། འདི་ཕྱི་གཏན་དུ་བདེ་བ་འབའ་ཞིག་ལས།། སྡུག་བསྔལ་མིང་ཡང་མེད་དོ་སྙིང་གཏམ་ཡིན།། མི་རྣམས་དམྱལ་བའི་རྒྱུ་ལའང་དེ་ཙམ་དུ།། འབད་པར་རིགས་ན་རང་རེ་གཏན་བདེའི་རྒྱུར།། དམ་པའི་ཆོས་ལ་ཅི་སྟེ་འབད་མི་རིགས།། ཡོད་རྒུའི་རྩལ་གྱིས་འབུངས་ཤིག་སྙིང་གཏམ་ཡིན།། མདོར་ན་མ་འོངས་གཏན་གྱི་བདེ་སྔུག་ནི།། ད་ལྟའི་སྤྱོད་ཚུལ་ཉིད་ལ་རག་ལས་པས།། བག་མེད་ལེ་ལོའི་དབང་དུ་མི་གཏོང་བར།། ཚེ་ལྷག་དོན་ལྡན་མཛོད་ཅིག་སྙིང་གཏམ་ཡིན།། ཕྱི་མར་བསམ་ནས་ཚེ་འདི་བློས་བཏང་སྟེ།། ཆོས་ཤིག་བྱེད་ན་ཕྱི་མར་ལྟ་ཞོག་གི། ཚེ་ཐུང་འདིར་ཡང་གཞན་དང་མི་འདྲ་ཙམ།། འོང་བར་མཐོང་ཆོས་ལགས་སོ་སྙིང་གཏམ་ཡིན།། དེ་ལྟར་ཕན་པའི་སེམས་ཀྱིས་རང་གིས་རང་།། ཆོས་ལ་བསྐུལ་བའི་ཀྱོ་བ་རྣོན་པོ་འདིས།། མ་དུལ་སེམས་ཀྱི་གླང་པོ་མྱུར་ཐུལ་ནས།། ཀུན་ཀྱང་གཏན་བདེའི་ལམ་དུ་ཚུད་པར་ཤོག།  །། 

      ཞེས་རོང་ཆེན་ལྷ་རྒྱལ་དཔལ་གྱིས་ཀྲུང་གོ་བོད་ཀྱི་དྲ་བ་ལས་བཏུས་སོ།


   


发表评论 评论 (2 个评论)

回复 久美多吉 2020-7-3 16:56
མགྱོགས་མྱུར་ངང་བལྟས་ཚར།  
快速浏览,一大堆没懂的
回复 ljh8520035 2020-7-3 18:34
久美多吉 2020-7-3 16:56
མགྱོགས་མྱུར་ངང་བལྟས་ཚར།  
快速浏览,一大堆没懂的

不要紧,慢慢来,要读懂一篇文章,需要功夫的。     

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2020-7-12 17:35 , Processed in 0.061280 second(s), 20 queries .

返回顶部