日志

༄༅།།རྗེ་ཙོང་ཁ་པ་ཆེན་པོ་བློ་བཟང་གྲགས་པ། ... ...

已有 95 次阅读2020-4-20 07:59 |系统分类:文化


                                       ༄༅།།རྗེ་ཙོང་ཁ་པ་ཆེན་པོ་བློ་བཟང་གྲགས་པ། 
                            ཡོང་ཁུངས། མཚོ་སྔོན་བོད་སྐད་རླུང་འཕྲིན་དྲ་བ། རྩོམ་པ་པོ། རྡེའུ་དཀར་ནག་གིས་བསྒྲིགས།

                     

    ༄༅།།རྗེ་ཙོང་ཁ་པ་ཆེན་པོ་བློ་བཟང་གྲགས་པ་ནི་བོད་རབ་བྱུང་དྲུག་པའི་མེ་བྱ༡༣༥༦ལོར་མདོ་སྨད་སའི་ཆ་ཤར་ཙོང་ཁའི་ཡུལ་ཏེ། དེང་གི་མཚོ་སྔོན་ཞིང་ཆེན་ཁོངས་སུ་སྐུ་འབུམ་དགོན་པ་ཆགས་ཡུལ་དེར་ཡབ་དར་ཁ་ཆེ་ཀླུ་འབུམ་དགེ་དང་ཡུམ་ཤིང་བཟའ་ཨ་ཆོས་གཉིས་ཀྱི་སྲས་སུ་སྐུ་བལྟམས། དགུང་ལོ་གསུམ་ལ་བཞེས་སྐབས་ཀརྨ་རོལ་བའི་རྡོ་རྗེ་ལས་དགེ་བསྙེན་གྱི་སྡོམ་པ་བཞེས་ཤིང་མཚན་ལ་ཀུན་དགའ་སྙིང་པོ་ཞེས་གསོལ། དགུང་ལོ་བདུན་པར་ཆོས་རྗེ་དོན་གྲུབ་རིན་ཆེན་པས་མཁན་པོ་མཛད་པ་དང་། ཏཱ་དབེན་གཞོན་ནུ་སེང་གེའི་སློབ་མ་གཞོན་ནུ་སེང་གེའི་སློབ་མ་མཛད་དེ་དགེ་ཚུལ་གྱི་སྡོམ་པ་བཞེས་ནས་མཚན་བློ་བཟང་གྲགས་པ་ཞེས་གསོལ། དགུང་ལོ་བཅུ་དྲུག་ལ་སོན་སྐབས་ཆབ་མདོ་བརྒྱུད་དབུས་སུ་ཕེབས། དགུང་ལོ་བཅུ་བདུན་པའི་སྟེང་དབུས་སུ་བྱོན་ནས་ཚལ་གུང་ཐང་དུ་དཀོན་མཆོག་སྐྱབས་ཀྱི་དྲུང་ནས་སྨན་དཔྱད་ཡན་ལག་བརྒྱད་པའི་གཞུང་ལ་སྦྱང་བ་གནང་། ཆུ་གླང་༡༣༧༣ལོའི་སྟོན་དུས་འབྲི་གུང་མཐིལ་དུ་ཕེབས་ནས་སྤྱན་སྔ་ཆོས་ཀྱི་རྒྱལ་པོ་མཇལ་ཞིང་། ཐེག་ཆེན་སེམས་བསྐྱེད་སོགས་ཞུ་གནང་མཛད། དགུང་ལོ་བཅུ་དགུ་པར་གསང་ཕུའི་གླིང་སྟོད་ཆོས་གྲྭར་ཞུགས་ནས་ཕར་ཕྱིན་གྲྭ་སྐོར་མཛད། དགུང་ལོ་ཉི་ཤུ་རྩ་གཅིག་པར་གཙང་ཕྱོགས་སུ་ཕེབས་ནས་མྱང་དབོན་ཀུན་དགའ་དཔལ་བཟང་དང་རྗེ་བཙུན་རེད་མདའ་བ་གཞོན་ནུ་བློ་གྲོས། རྗེ་བཙུན་ཆོས་ཀྱི་དཔལ་བ། ས་སྐྱ་བསོད་ནམས་རྒྱལ་མཚན། སྣར་ཐང་ལོ་ཙཱ་པ་སོགས་བསྟེན་ནས་གཞུང་ཕར་ཚད་སོགས་དཔྱིས་ཕྱིན་པ་གསན་སྦྱོང་མཛད་པས་མཁས་པའི་གྲགས་པ་ཐོབ། དགུང་ལོ་ཉེར་ལྔའི་ཐོག་ཕར་ཕྱིན་ཊཱིཀྐ་མཛད། དགུང་ལོ་ཉི་ཤུ་རྩ་བདུན་པར་ཡར་ལུང་དུ་ཕེབས་ནས་མཁན་ཆེན་དཀའ་བཞི་ཚུལ་ཁྲིམས་རིན་ཆེན་གྱི་དྲུང་ནས་བསྙེན་རྫོགས་ཀྱི་སྡོམ་པ་བཞེས། རྩེད་ཐང་གི་ཆོས་གྲྭར་ཞུགས་ནས་དཀའ་ཆེན་བཞིའི་གྲྭ་སྐོར་གནང་། དགུང་ལོ་ཉེར་དགུ་པར་ལྷ་སར་ཕེབས་ཏེ་ཚལ་གུང་ཐང་དུ་བཀའ་འགྱུར་ཞིབ་གཟིགས་གནང་། དགུང་ལོ་སོ་དྲུག་ཐོག་རྗིང་ཕྱིའི་བྱམས་པ་ཞིག་གསོ་མཛད།དགུང་ལོ་སོ་དགུ་པར་གཉལ་སྡོད་རབ་གྲོང་དུ་དཀའ་བཅུའི་གྲྭ་སྐོར་མཛད། དགུང་ལོ་ཞེ་དྲུག་ཐོག་རྭ་སྒྲེང་དུ་བྱང་ཆུབ་ལམ་རིམ་ཆེན་མོ་དང་། དགུང་ལོ་ཞེ་དགུར་སྔགས་རིམ་ཆེན་མོ་སོགས་མཛད། དགུང་ལོ་ང་གསུམ་སྟེང་ཆོ་འཕྲུལ་སྨོན་ལམ་ཆེན་མོའི་སྲོལ་བཏོད། འབྲོག་རི་བོ་དགའ་ལྡན་ཕྱག་བཏབ། དགུང་ལོ་ང་དགུ་པར་དགའ་ལྡན་ཡངས་བ་ཅན་གྱི་རྨང་བཏིངས། འགྲེལ་བ་ཞིབ་སྦྲགས་མཛད། དགུང་ལོ་རེ་གཅིག་ཐོག་དགའ་ལྡན་ཡངས་པ་ཅན་རྟེན་དང་བརྟེན་པར་བཅས་པར་གྲུབ་པའི་རབ་གནས་མཛད་པ་སོགས་གྲུབ་མཐའ་ཀུན་ལ་རིས་མེད་ཀྱིས་སློབ་གཉེར་མཛད་ནས་ཕྱི་རུ་ཉན་ཐོས་ཀྱི་སྤྱོད་པ་ཞི་ཞིང་དུལ་བ་དང་། ནང་དུ་རིམ་གཉིས་ཀྱི་རྣལ་འབྱོར་ལ་གཞོལ་བའི་ལྟ་སྤྱོད་གཙང་མའི་ལུགས་བཟང་སྤེལ་ཏེ་གངས་ཅན་སྐྱེ་འགྲོ་ཀུན་གྱི་གཙུག་ཏུ་བཀུར་ཞིང་མཐའ་དབུས་སྐྱེ་འགྲོ་ཀུན་གྱི་གུས་ཤིང་བཏུད་པའི་གནས་སུ་གྱུར། ཆོ་འཕྲུལ་སྨོན་ལམ་དང་དགའ་ལྡན་སྒྲུབ་མཆོད་ཆེན་མོ། གཉལ་གྱི་ལུང་ར་ཆེན་མོ། རྗིང་ཕྱིའི་བྱམས་པ་ཞིག་གསོ་བཞི་ནི་རྗེའི་མཛད་ཆེན་བཞིར་གྲགས། མཐར་དགུང་གྲངས་རེ་གསུམ་པ་རབ་བྱུང་བདུན་པའི་ས་ཕག་སྤྱི་ལོ༡༤༡༩ལོའི་ཟླ་བཅུ་པའི་ཚེས་ཉེར་ལྔ་ཉིན་ལ་གཟིམ་ཁང་འོད་སྦུག་ཏུ་སྐུ་མྱ་ངན་ལས་འདས། གསུང་འབུམ་པོད་བཅུ་དགུ་བཞུགས་སོ།།

     ཞེས་རོང་ཆེན་ལྷ་རྒྱ་རྒྱལ་དཔལ་གྱིས་ཀྲུང་གོའི་བོད་ལྗོངས་དྲ་བ་ལས་བཏུས་སོ།།


评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2020-5-30 20:11 , Processed in 0.049743 second(s), 20 queries .

返回顶部