日志

༄༅།།འཛམ་གླིང་ན་ཧ་ཅང་གྲགས་ཆེ་བའི་བོད་ཀྱི་ ...

已有 133 次阅读2020-2-27 08:37 |系统分类:文化


                              
                          ༄༅།།འཛམ་གླིང་ན་ཧ་ཅང་གྲགས་ཆེ་བའི་བོད་ཀྱི་གསང་བ་ཁག་བཅུ་ཞེས་ཤེས་བྱའི་ཟེགས་མ་བཞུགས་སོ།

                                             ཡོང་ཁུངས། རེབ་གོང་རིག་གནས། རྩོམ་པ་པོ། མི་གསལ།

                    

         དང་པོ། གངས་དམར་པོའི་གསང་བ།

     རྒྱ་མཚོའི་ངོས་ལས་མཐོ་ཚད་རྨིད་ལྔ་སྟོང་ཡན་ཟིན་པའི་རི་བོ་ཧི་མ་ལ་ཡའི་གངས་འཁྱགས་ཀྱི་ངོས་སུ་ཁྲག་གི་ཐིག་རིས་བཀྲ་བའི་དམར་མདངས་ལྡན་པའི་ལྭ་བས་བཀླུབས་ཡོད། རྒྱང་རིང་ནས་བལྟས་ཚེ། རི་བོའི་ལྡེབས་སུ་གངས་དམར་པོ་བབས་པ་དང་ཨ་ན་མ་ན་རེད། མི་ཚོས་ཟེར་ན། དེ་ནི་རི་བོ་ཧི་མ་ལ་ཡའི་སྐྲ་རྫོབ་དམར་པོ་ཅན་གྱི་གངས་མིས་རྫུ་འཕྲུལ་བསྟན་ནས་བཟོས་པ་རེད་ཟེར་བ་དང་། ཡང་ལ་ལས་དེ་ནི་གངས་འཁྱགས་ཀྱིས་དམ་ལ་བཏགས་པའི་སྲིན་པོ་རི་ལས་ཤོར་བ་རེད་ཟེར། གང་ལྟར་ངོ་མཚར་ཆེ་བའི་བཤད་རྒྱུན་དེ་དག་དང་འགྲོགས་པའི་རི་བོ་ཧི་མ་ལ་ཡའི་བརྗིད་ཆགས་ལྟ་ན་སྡུག་པའི་གངས་རི་དམར་པོའི་མཛེས་ལྗོངས་ཀྱིས་འཛམ་གླིང་སྐྱེ་བོ་ཀུན་གྱི་ཡིད་དབང་ཅིག་ཅར་དུ་འཕྲོག་བཞིན་མཆིས།

         གཉིས་པ། མི་རྒོད་ཀྱི་གསང་བ།

     བོད་ཀྱི་མི་རྒོད་ཀྱི་གསང་བ་དེས་སྐབས་ཤིག་རིང་འཛམ་གླིང་སྐྱེ་བོ་མང་པོའི་སྨྲ་ལྕེ་ལ་ཚ་བ་རྒྱས་སུ་བཅུག་པ་དང་། དེ་ནི་འཛམ་གླིང་གི་འགྲེལ་བརྗོད་དཀའ་བའི་གསང་བ་ཆེན་པོ་བཞི་ཡི་ཡ་རྒྱལ་ཡིན། ཉེ་བའི་ལོ་འགའི་ནང་། མི་མང་པོ་ཞིག་གིས་ཧི་མ་ལ་ཡའི་རི་ཁུལ་ནས་མི་རྒོད་དངོས་སུ་མཐོང་བའི་གཏམ་རྒྱུད་གླེང་རྒྱུ་ཡོད། ཚན་རིག་རྟོག་ཞིབ་ཚོགས་པས་བོད་དུ་མྱུལ་ནས་ཆེད་མངགས་མི་རྒོད་ཀྱི་ལྐོག་གྱུར་གསང་བ་བཀྲོལ་ཐབས་བྱས་ཀྱང་། མི་རྒོད་ཀྱི་གསང་བའི་མདུད་པ་ད་དུང་བཀྲོལ་ཐུབ་མེད།

     གསུམ་པ། ཕུང་པོ་འོད་སྐུར་གྲོལ་བའི་གསང་བ། 

     ཆོས་ཀྱི་རྟོགས་པ་མཐོ་བའི་བོད་ཀྱི་བླ་མ་གྲུབ་ཆེན་དག་སྐུ་མྱ་ངན་ལས་འདའ་སྐབས། སྐུ་ཡི་ཤ་རུས་མ་ལུས་འཇའ་ལུས་འོད་སྐུ་ལ་ཐིམ་ནས། དག་པ་མཁའ་སྤྱོད་ཞིང་དུ་ཕེབས་པའི་ངོ་མཚར་འགྲེལ་བརྗོད་དཀའ་བའི་སྣང་ཚུལ་ཞིག་མཆིས་པས་གསང་བ་དེ་ཡང་ད་དུང་གསལ་བཤད་བྱེད་ཐབས་བྲལ་འདུག 

         བཞི་བ། ཇོ་མོ་གླང་མའི་སྤྲིན་གྱི་དར་ཚོན་གྱི་གསང་བ།

     ནམ་མཁའ་གཡའ་དག་ཅིང་ས་གཞི་རྡུལ་དག་པའི་སྐབས་སུ། རི་བོ་ཇོ་མོ་གླང་མའི་དབུ་རྩེར་རབ་དཀར་སྤྲིན་གྱི་དར་ཚོན་འཕྱར་བའི་དཀྱིལ་འཁོར་མཛེས་སྡུག་ཡི་གར་འོང་བ་ཞིག་མཇལ་རྒྱུ་ཡོད། ཚན་རིག་པས་འགྲེལ་བརྗོད་བྱས་པ་ལྟར་ན། དེ་ནི་འགུལ་སྐྱོད་རང་བཞིན་གྱི་སྤྲིན་གྱི་བང་རིམ་བརྩེགས་མས་གྲུབ་ཅིང་། སྤྲིན་དཀར་གཡོ་ཕྱོགས་ཀྱི་གནས་དང་མཐོ་ཚད་ལ་གཞིགས་ནས་རི་བོའི་སྤོ་ཡི་རླུང་ཤུགས་ལ་ཚོད་བགམ་བྱེད་ཐུབ། གལ་སྲིད་སྤྲིན་གྱི་དར་ཚོན་མཐོན་པར་གཡོ་ན་བར་སྣང་དུ་རྒྱུ་བའི་རླུང་ཤུགས་ཅུང་ཆུང་བ་ཡོད་པ་དང་། དེ་ལས་ལྡོག་ན་བར་སྣང་དུ་རྒྱུ་བའི་རླུང་ཤུགས་ཅུང་ཆེ་བ་ཡོད། གལ་སྲིད་རི་རྩེ་དང་མཉམ་པར་གནས་ན། རླུང་ཤུགས་རིམ་པ་དགུ་ལ་ཟིན་གྱི་ཡོད། དེར་བརྟེན་རི་བོ་ཇོ་མོ་གླང་མའི་སྤྲིན་གྱི་དར་ཚོན་ལ་འཛམ་གླིང་ཐོག་ཆེས་མཐོ་བའི་རླུང་ཤུགས་བརྟག་བྱེད་དུ་འབོད་ཀྱི་ཡོད།

         ལྔ་བ། གནའ་རབས་ཞང་ཞུང་གི་གསང་བ།

     གནའ་དཔྱད་རིག་པའི་ཞིབ་འཇུག་དང་ལོ་རྒྱུས་དེབ་ཐེར་ཐོག་འཁོད་པར་གཞིགས་ན། ཁྱུང་ལུང་དུ་འབོད་པའི་གནའ་བོའི་ཞང་ཞུང་གི་ས་ཆ་དེ་ནི་སྤྱི་ལོའི་སྔོན་གྱི་དུས་རབས་བཅུ་བ་ཙམ་ནས་མཚོ་བོད་མཐོ་སྒང་དུ་ཆགས་ཤིང་། དེ་ནི་གདོད་མའི་དུས་ཀྱི་མཚོ་བོད་མཐོ་སྒང་གི་ཤེས་དཔལ་རིག་གནས་ཀྱི་ལྟེ་གནས་ཡིན། གནའ་བོའི་ཞང་ཞུང་ལ་ཤེས་རིག་དཔལ་ཡོན་ཟླ་བ་ཡར་ངོའི་རྒྱུན་བཞིན་འཕེལ་བ་དང་། རང་ངོས་ཀྱི་དམིགས་བསལ་ཁྱད་ཆོས་ལྡན་པའི་ཞང་ཞུང་གི་ཡི་གེ་བྱུང་བ་མ་ཟད། བོད་ཀྱི་ས་སྐྱེས་རྡོ་སྐྱེས་ཀྱི་གདོད་མའི་ཆོས་ལུགས་གཡུང་དྲུང་བོན་གྱི་འབྱུང་གནས་ཀྱང་ཡིན་པར་གྲགས།  ཕྱིས་སུ་མཐུ་བྷོད་བཙན་པོའི་རྒྱལ་རབས་དབུ་བརྙེས་པ་དང་བསྟུན་ནས། སྤྱི་ལོའི་དུས་རབས་བརྒྱད་པའི་ཡས་མས་སུ་སླེབས་སྐབས། ཞང་ཞུང་ཡོངས་སུ་དབང་དུ་བསྡུས་པ་དང་། དུས་དེ་ནས་བཟུང་། ཞང་ཞུང་རྒྱལ་རབས་ཐོར་ཞིག་ཏུ་སོང་སྟེ་ལོ་ངོ་སྟོང་གི་གསང་བ་ས་འོག་ཏུ་ལུས།     

         དྲུག་པ། གེ་སར་སྒྲུང་པའི་གསང་བ།  

     གླིང་རྗེ་གེ་སར་རྒྱལ་པོའི་སྒྲུང་ནི་བོད་མི་རིགས་ཀྱི་དཔའ་བོའི་རྟོགས་བརྗོད་སྙན་ངག་རིང་ཤོས་ཤིག་ཡིན་ཞིང་། འཆད་གྱེར་གྱི་རྣམ་པ་གཙོ་བོར་བཟུང་ནས་མི་རབས་ནས་མི་རབས་བར་རྒྱུན་ཆད་མེད་པར་དར་བ་མ་ཟད། སྒྲུང་མཁན་ཚང་མར་རང་རང་ངོ་མཚར་གྱི་གཏམ་རྒྱུད་རེ་གླེང་རྒྱུ་ཡོད། སྒྲུང་ཚན་མང་པོ་འཆད་ཐུབ་མཁན་གྱི་སྒྲུང་མཁན་སྒྱུ་རྩལ་བ་ཕུལ་དུ་བྱུང་བ་ཕལ་ཆེ་བས་རང་ཉིད་ནི་གེ་སར་གྱིས་ཆེད་དུ་མི་ཡུལ་ལ་མངགས་པའི་སྒྲུང་མཁན་ཡིན་རབས་གསུང་མཁན་མང་ལ། ཁོང་ཚོས་འཆད་གྱེར་བྱེད་པའི་གེ་སར་སྒྲུང་གི་ནང་དོན་ཚང་མ་ལྷས་དམིགས་སུ་ལུང་བསྟན་ནས་བྱུང་བར་ངོས་འཛིན་བྱེད་ཀྱི་ཡོད། ཁོང་ཚོ་ལོ་ན་ཆུང་དུས་སུ་སྤང་ལྗོངས་གང་རུང་དུ་དུས་ཡུན་རིང་པོར་གཉིད་དུ་ཡུར་ནས་རྨི་ལམ་དུ་གེ་སར་གྱི་ལུང་བསྟན་ཚུལ་གྱི་རྣམ་པ་བརྒྱུད་དེ་གཉིད་ལས་སངས་སྐབས་གླིང་སྒྲུང་ཆུ་རྒྱུགས་རྒྱུགས་འཆད་ནུས་པའི་ངོ་མཚར་གྱི་རྣམ་པ་དེར་འཛམ་གླིང་སྐྱེ་བོ་ཚང་མ་ཧ་ལས་པར་གྱུར་ཡོད།

         བདུན་པ། གུ་གེའི་རྒྱལ་རབས་ཀྱི་གསང་བ།

     མངའ་རིས་གུ་གེའི་རྒྱལ་རབས་ཀྱིས་ལོ་ངོ་བདུན་བརྒྱ་ལྷག་ཙམ་གྱི་ལོ་རྒྱུས་ཆུ་རྒྱུན་རིང་མོའི་ནང་འོད་སྟོང་འཕྲོ་བའི་ཤེས་དཔལ་རིག་གནས་གཏོད་ཡོད། ༡༦༣༠ལོར། ལ་དྭགས་ཀྱིས་བཙན་འཛུལ་བྱས་ནས་གུ་གེའི་རྒྱལ་རབས་ཉམས་རྒུད་དུ་སོང་ཞིང་། མི་ཚོས་གུ་གེའི་རྒྱལ་རབས་ཀྱི་ཤེས་དཔལ་དུས་ཐུང་ནང་བརླགས་པའི་སྣང་ཚུལ་དེ་དང་མ་ཡའི་(瑪雅)ཤེས་རིག་རླུང་ཁྲོད་མར་མེ་བཞིན་འཇིག་པའི་སྣང་ཚུལ་གཉིས་འདྲ་མཚུངས་སུ་བརྗོད་ཀྱི་ཡོད།

    གང་ལྟར། མིག་མདུན་དུ་ལྷག་པའི་བརྗིད་ཆེ་བའི་གུ་གེའི་མཁར་ཤུལ་གྱི་ཉམས་སྣང་དང་། གུ་གེའི་ངོ་མཚར་གྱི་གཏམ་རྒྱུད་མང་པོས་གནའ་རྫས་རྟོག་ཞིབ་པ་མང་པོའི་ཡིད་དབང་འགུག་བཞིན་ཡོད་ཅིང་། དེ་དང་བསྟུན་ནས་འཛམ་གླིང་སྐྱེ་བོ་མང་པོའི་སེམས་ལ་གུ་གེའི་རྒྱལ་རབས་ཀྱི་གསང་བའི་གྱང་རོ་ལུས་ཡོད།

       བརྒྱད་པ། གཏེར་མའི་གསང་བ།

    བཤད་སྲོལ་ལ། བོན་ཆོས་སམ་བོད་རྒྱུད་ནང་བསྟན་ཆོས་ལུགས་ཀྱི་དཔེ་ཆའམ་མ་ཎི་བཀའ་ཆོས་གང་རུང་གེགས་བར་འཕྲད་ནས་བརྒྱུད་སྤེལ་བྱེད་ཐབས་བྲལ་བའི་སྐབས་སུ། དེ་རྒྱུན་ཆད་ནས་མ་སྟོང་པའི་ཆེད་དུ་གནས་སྐབས་ཤིག་གི་རིང་ལྷས་སྐལ་ལྡན་སྐྱེ་བོ་ག་གེ་མོའི་འདུ་ཤེས་ཀྱི་གཏིང་ཟབ་སར་སྦས་ཤིང་། སླར་ཡང་བརྒྱུད་སྤེལ་བྱེད་པའི་དུས་ལ་འབབ་དུས། ངོ་མཚར་ཆེ་བའི་ལྷའི་བྱིན་མཐུས་རིག་འཛིན་གཏེར་སྟོན་པ་རྣམ་པའི་ངག་ལས་བརྡོལ་བའམ་ཟིན་ཐོར་བཀོད་པའི་ངོ་མཚར་ཆེ་བའི་སྣང་ཚུལ་ཞིག་རེད།

         དགུ་བ། ལྷ་པའི་གསང་བ། 

     བོད་ཀྱི་གདོད་མའི་ཆོས་ལུགས་ཀྱི་ཆོ་ག་ཉམས་སུ་ལེན་མཁན་ལྷ་པ་ཧ་ཅང་མང་པོས་ཀུན་གྱི་འདྲེན་བྱེད་དབང་པོའི་ལམ་དུ་མི་སྣང་པའི་ལྷ་འདྲེ་དང་སྐད་ཆ་ཤོད་ཐུབ་པ་མ་ཟད། མ་འོངས་སྔོན་ཤེས་ཐུབ་པ་དང་། རྟགས་དང་མཚན་མ་ཡ་མཚན་འཛོམས་པ། ལྷ་བསུ་འདྲེ་འབུད་བྱེད་པ། གེགས་བསེལ་ནད་བཅོས་སོགས་ཀྱི་ནུས་མཐུ་ཁྱད་པར་ཅན་འཛོམས་ཡོད། ཁོང་ཚོ་ནི་མི་དང་ལྷའི་བར་དུ་འབྲེལ་གཏུགས་བྱེད་པའི་ཟམ་ཆེན་ལྟ་བུར་ངོས་འཛིན་གྱི་ཡོད།

       བཅུ་བ། ཤམ་བྷ་ལའི་གསང་བ།

    བོད་མིའི་ངག་རྒྱུན་དུ་གྲགས་པའི་གནས་མཆོག་ཤམ་བྷ་ལའི་ཡུལ་གྱི་བཀོད་པའི་ཐད། ཤམ་བྷ་ལ་ནི་གངས་རིའི་ལྟེ་བའི་ནུབ་རྒྱུད་ཡང་རྩེར་གནས་ཤིང་། པད་མའི་འདབ་མ་ལྟར་ཟླུམ་པ་དང་། མཐའ་བཞི་གངས་རིས་བསྐོར་བ། གངས་དཀར་རི་བོའི་རྩེ་མོ་ནས་རི་འདབས་ཀྱི་ཚང་ཚིང་ནགས་ཚལ་ཚང་མར་མེ་ཏོག་དང་དྲི་ཞིམ་སྨན་རྩྭས་ཁེངས་ཡོད་པ། ནམ་མཁའི་སྐར་ཚོགས་ས་ལ་འཕོས་འདྲའི་མཚོ་དང་མཚེའུ་གྲངས་ཀྱིས་མི་ལངས་བ། སྒོམ་སྒྲུབ་ཀྱི་གནས་མཆོག་ཁྱད་པར་ཅན་གང་སར་འཛོམས་པར་བཤད་སྲོལ་ཡོད་ཅིང་། གནས་དེ་ལ་དམག་འཁྲུག་དང་མུ་གེའི་སྡུག་བསྔལ་མེད་པ། སྐྱེ་བོ་ཚང་མ་འདྲ་མཉམ་ཡིན་པའི་མཐོ་རིས་ལྷའི་འཇིག་རྟེན་ལྟ་བུར་བརྗོད་ཀྱི་ཡོད། གང་ལྟར་ཡང་། དེ་ནི་མཛེས་སྡུག་ལྡན་པའི་བོད་མིའི་སེམས་ཀྱི་གསང་བའི་གནས་མཆོག་རྩ་ཆེན་ཞིག་ཡིན་པ་དང་བཅས་སོ།། 

    ཞེས་རོང་ཆེན་ལྷ་རྒྱལ་དཔལ་གྱིས་མཚོ་སྔོན་རེབ་གོང་རིག་གནས་ལས་བཏུས་ནས་བསྒྲིགས་སོ།   


 

评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2020-4-7 16:42 , Processed in 0.050918 second(s), 20 queries .

返回顶部