日志

༄༅།།འབྲོག་པའི་གསར་འགྱུར་བྱ་འཕུར་མ།། ... ... . ...

已有 105 次阅读2020-2-21 10:33 |系统分类:娱乐


                                        ༄༅།།འབྲོག་པའི་གསར་འགྱུར་བྱ་འཕུར་མ།།

                                     ཡོང་ཁུངས། དྲ་རྒྱ་སྡོམ་པོ། རྩོམ་པ་པོ། ལོ་བ་རྟ་མགྲིན་རྒྱལ།


                 

                          ཤར་ནས་ལུག་ཁྲོམ་ཉོས་ནས་ལུག་རྒྱུད་བརྫོག།

                       ལྷོ་ནས་བོག་རྡུ་ཉོས་ནས་ནོར་རྒྱུད་བརྫོག།

                       བྱང་ནས་རྟ་གསེབ་ཉོས་ནས་རྟ་རྒྱུད་བརྫོག།

                       བཅོས་སྒྱུར་སྒོ་འབྱེད་ཅིག་གི་བསམ་པའི་བཟུང་།།


                       ཁྱི་རྒན་ཆ་བོ་བཏང་ནས་ཤར་ར་བདའ།།

                       ར་མ་ཆ་བོ་བཙོང་ནས་རྩ་མེད་བྱས།།

                       ལོ་ལོན་ཆ་བོ་ཁྲིད་ནས་གྲོང་ལ་སོང་།།

                       མ་རྩ་དགའ་ཟིག་ཡོད་པའི་བསམ་པའི་བཟུང་།།


                       ཆོས་སྒམ་དུད་དྲེགས་ཅན་གོ་མེ་ལ་བུས།།

                       ཐང་ག་ཚུ་དྲེགས་ཅན་པོ་ཡར་ར་ལྟེབས།།

                       མགོ་སྦྲ་སྨུག་པོས་ཨོང་བ་བཏུམ་སྤྱད་བྱས།།

                       འཚོ་བ་གསར་བ་ཞིག་གི་བསམ་པའི་བཟུང་།།


                       མི་གཅིག་མི་རིགས་གཞན་ཞིག་མག་པ་བཞག།

                       རང་སྐད་བོར་བའི་ཚ་ཚོའུ་ཁྱིམ་གང་སྐྱེས།།

                       ཆོག་གི་ཧྲ་གི་ཟེར་བཞིན་རང་སེམས་གསོས།།

                       མི་རིགས་མཐུན་སྒྲིལ་ཟེར་བ་འདི་རེད་འདོད།།


                       ཟོག་ལ་དཀའ་ཀི་ཟེར་བཞིན་ཚང་མ་བཙོང་།།

                       རྫོང་ལ་དགའ་ཀི་ཟེར་བཞིན་ཚང་མ་སོང་།།

                       ཤ་ལ་རྡ་ཀི་ཟེར་བཞིན་རུམ་ལ་ཀློང་།།

                       ཞོ་ར་དྲན་ཀི་ཟེར་བཞིན་རྔམ་པ་བཏོན།།


                       རེ་འགས་ཏཱ་ཀོན་བྱས་ཀྱང་ལོ་པཎ་བྲོས།།

                       རེ་འགས་ཞོ་ཀོན་བྱས་ཀྱང་རྐང་ལག་བཅག།

                       རེ་འགས་ཟོག་ཆོ་རིན་པ་རྐུན་མས་ཁྱེར།།

                       འཇིག་རྟེན་དམྱལ་བ་ཟེར་བ་འདི་རེད་འདོད།།


                       ལོ་ལོན་རེ་འགའ་སྲང་ན་ཉི་མ་གཞེས།།

                       གཞོན་པ་རེ་འགས་ཇ་ཁང་ཆང་ཁང་ཉུགས།།

                       ལག་སྟོང་མཆན་ན་བཙུར་བའི་གྲོང་ཁྱེར་དུ།།

                       ཟོག་ཐོ་ཆ་བོ་རྨི་ལམ་ནང་དུ་འཁོར།།


                       ལུག་ཤ་རྫུན་མ་ཟས་ནས་མཆིན་པ་གཟེར།།

                       འོ་ཞོ་རྫུན་མ་འཐུང་ནས་ཧོ་ཁ་ན།།

                       གྲོགས་པོ་རྫུན་མ་ཐུག་ནས་ཁྱིམ་ནོར་བོར།།

                       སྙིང་རླུང་སྟོད་ལ་འཚང་བཞིན་རྩྭ་ཐང་དྲན།།


                       རླངས་འཁོར་ཡོད་ཀྱང་སྣུམ་རིན་དཀའ་བས་སྡུག།

                       སྣུམ་རིན་སྤྲད་ཀྱང་ལག་རྟགས་མེད་པས་བཟུང་།།

                       ལག་རྟགས་བླངས་ཀྱང་རླངས་འཁོར་ཆགས་པས་སྐྱོ།།

                       གྲོང་ཁྱེར་ནང་དུ་རྟ་རྒན་དྲན་པ་མང་།།


                       རྒད་པོས་ཐད་གཏོང་བྱས་ནས་གཅེར་བུར་བུད།།

                       རྒད་མོས་ཚོགས་པ་བཙུགས་ནས་རྒད་པོ་བརྗེད།།

                       བྱིས་པ་སློབ་གྲྭའི་ནང་ལ་རི་རྒྱག་བྱས།།

                       འདི་མོ་ལྟད་མོ་ཀུན་དང་ཀུན་ལ་ཁྱབ།།


                       ཨ་ཕ་ཁྱིམ་ལ་ཐོན་ཀྱང་ཇ་གང་མེད།།

                       ཆུ་རྒོད་དཀར་ཡོལ་གང་ལ་སྒོར་མོ་དགོས།།

                       ཐ་ན་གཅིན་ཅིག་བཏང་ན་སྒོར་མོ་དགོས།།

                       གྲོང་ཁྱེར་སྐྱིད་དང་མི་སྐྱིད་འདི་འདྲ་རེད།།


                       འབྲོག་པ་གོ་བརྡ་སྤྲད་པའི་གོ་རྩོམ་འདི།།

                       ཟུར་ཟ་འཁྱ་སྨོད་བྱས་པ་ཁ་རྒྱ་སྟོན།།

                       སྒོ་ཟོག་རྩ་རྫོག་བྱས་ནས་གྲོང་ཁྱེར་དུ།།

                       ཡོད་པའི་འབྲོག་པ་ཆ་བོས་ཤེས་ནི་རེད།།


                       རང་ལ་གཅེས་ན་བྱིས་པ་སློབ་གྲྭར་སྐྱོལ།།

                       རང་ལ་གཅེས་ན་སྒོ་ཟོག་འཚོ་སྐྱོང་བྱོས།།

                       རང་ལ་གཅེས་ན་ཕུ་ནུ་ནང་བཟང་བྱོས།།

                       རང་ལ་གཅེས་ན་བོད་སྐད་གཙང་མ་ཤོད།།


      ཅེས་ལོ་བ་རྟ་མགྲིན་རྒྱལ་གྱིས༼འབྲོག་པའི་གསར་འགྱུར་བྱ་འཕུར་མ༽ཟེར་བ་འདི་ངོ་ཤེས་ཞིག་གིས་འདི་འདྲ་ཞིག་འབྲི་རོགས་ཞེས་ཡང་ཡང་བཤད་མཐར་སྤྱི་སྤྱོད་རླངས་འཁོར་ཞིག་ཏུ་ཤར་མར་བྲིས་སོ།།

      ཞེས་རོང་ཆེན་ལྷ་རྒྱལ་དཔལ་གྱིས་དྲ་ལམ་ཞིག་ནས་བཏུས་སོ།།



评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2020-4-7 15:39 , Processed in 0.052439 second(s), 20 queries .

返回顶部