日志

༄༅།།ཀུན་གཟིགས་པཎ་ཆེན་སྐུ་ཕྲེང་དགུ་པ་བློ་ ...

已有 103 次阅读2020-1-14 15:00 |系统分类:文化


                  ༄༅།།ཀུན་གཟིགས་པཎ་ཆེན་སྐུ་ཕྲེང་དགུ་པ་བློ་བཟང་ཐུབ་བསྟན་ཆོས་ཀྱི་ཉི་མའི་རྣམ་ཐར་མདོར་བསྡུས།

                                       ཡོང་ཁུངས། ཀྲུང་གོའི་བོད་ལྗོངས་དྲ་བ། རྩོམ་པ་པོ། མི་གསལ།

                  

                               ༧ ཀུན་གཟིགས་པཎ་ཆེན་སྐུ་ཕྲེང་དགུ་པ་བློ་བཟང་ཐུབ་བསྟན་ཆོས་ཀྱི་ཉི་མ་དགེ་ལེགས་རྣམ་རྒྱལ་ཞབས་ལ་ན་མོ།

      ༄༅།།ཀུན་གཟིགས་པཎ་ཆེན་སྐུ་ཕྲེང་དགུ་པ་བློ་བཟང་ཐུབ་བསྟན་ཆོས་ཀྱི་ཉི་མ་ནི། དྭགས་པོ་ཀ་ཤར་ཞེས་པའི་ཡུལ་དུ། ཡབ་རྟ་མགྲིན་དང་། ཡུམ་དམ་ཆོས་འཚོ་མོ་གཉིས་ཀྱི་སྲས་སུ་སྤྱི་ལོ1883ལོར་སྐུ་འཁྲུངས།  

      དགུང་ལོ་དྲུག་པར་པཎ་ཆེན་སྐུ་ཕྲེང་བརྒྱད་པའི་ཡང་སྲིད་དུ་ངོས་འཛིན་ཞུས། སྤྱི་ལོ1888ལོར་རྒྱལ་དབང་སྐུ་ཕྲེང་བཅུ་གསུམ་པ་ཆེན་མོ་ཐུབ་བསྟན་རྒྱ་མཚོ་མཆོག་གིས་གཙུག་ཕུད་བཞེས་ཤིང་། བློ་བཟང་ཐུབ་བསྟན་ཆོས་ཀྱི་ཉི་མ་དགེ་ལེགས་རྣམ་རྒྱལ་ཞེས་པའི་མཚན་གསོལ། དེ་ནས་ཡོངས་འཛིན་དཔོན་བྲང་བསྟན་འཛིན་དབང་རྒྱལ་ལས་དབང་ལུང་རྗེས་གནང་སོགས་ཆོས་བཀའ་མང་པོ་དང་གཞུང་ཆེན་མོ་རྣམས་ལ་གསན་བཞེས་མཛད། སྤྱི་ལོ1892ལོར་གདན་ས་བཀྲ་ཤིས་ལྷུན་པོའི་ཁྲིར་བཞུགས། སྤྱི་ལོ1902ལོར་ལྷ་ལྡན་གཙུག་ལག་ཁང་དུ་གོང་ས་རྒྱལ་བའི་དབང་པོ་ངག་དབང་བློ་བཟང་ཐུབ་བསྟན་རྒྱ་མཚོའི་ཞལ་སྔ་ནས་ལས་བསྙེན་རྫོགས་ཀྱི་སྡོམ་པ་བཞེས། རིམ་གྱིས་གཞུང་དཀའ་པོད་ལྔ་ལ་གོ་རིམ་ལྡན་པའི་ཐུགས་གཉེར་གནང་ཞིང་། ཚིག་དོན་ཀུན་ལ་ཐོས་བསམ་གྱིས་སྒྲོ་འདོགས་ལེགས་པར་བཅད་དེ་མཁས་པའི་ཡང་རྩེར་སོན། སྤྱི་ལོ1904ལོར་དབྱིན་ཇིའི་དམག་ལྷ་སར་འབྱོར་ཞིང་། དེའི་ཕྱི་ལོ་དབྱིན་ཇིས་གདན་འདྲེན་ཞུས་པ་ལྟར་རྒྱ་གར་ལ་ཕེབས། སྤྱི་ལོ1906ལོར་ཕྱིར་གཙང་དུ་ཕེབས། སྤྱི་ལོ1914ལོར་གདན་ས་ཆེན་པོ་བཀྲ་ཤིས་ལྷུན་པོར་གསེར་ཟངས་ལས་གྲུབ་པའི་རྒྱལ་བ་བྱམས་པའི་སྐུ་བརྙན་བོད་ཡུལ་ན་སྔར་མེད་པ་སྐུ་ཚད་ཐོག་སོ་བདུན་ནམ་ཁྲུ་བརྒྱད་ཅུ་གྱ་ལྔའི་བདག་ཉིད་ཅན་འགྲན་ཟླ་དང་བྲལ་བ་གསར་བཞེངས་མཛད། སྤྱི་ལོ1919ལོར་ལྷ་སར་ཕེབས་ནས་གོང་ས་བཅུ་གསུམ་པ་ཆེན་མོ་མཆོག་དཔལ་རྡོ་རྗེ་འཇིགས་བྱེད་ཀྱི་ལྗགས་བསྙེན་གྲུབ་པའི་ལེགས་འབུལ་མཇལ་ཕྱག་གི་ཆོས་མཐུན་མཛད་སྒོའི་ཞོར་ལ་བཀྲས་ལྷུན་བླ་བྲང་གི་ཆོས་གཞིས་ཞིང་འབྲོག་དམག་ཕོགས་དང་། ལམ་ཐོག་འཁྲི་སྒྲུབ་སྐོར་བཀའ་འཁྲུན་མ་ཆོད་པ་རྣམས་སྐྱབས་ཞུའི་བཀའ་མོལ་གནང་རྗེས་གཙང་དུ་ཕེབས། དེ་རྗེ་བླ་གཞུང་བར་གྱི་འགལ་བའི་དབང་གིས་སྤྱི་ལོ1923ལོར་ཀུན་གཟིགས་པཎ་ཆེན་སྐུ་ཕྲེང་དགུ་པ་ཉིད་སྟོན་འཁོར་གོ་ཧྲག་དང་བཅས་བྱང་ཐང་བརྒྱུད་པེ་ཅིན་དུ་ཆིབས་བསྒྱུར་གནང་ཞིང་། སྤྱི་ལོ1925ལོར་པེ་ཅིན་དུ་ཕེབས་འབྱོར་བྱུང་། གོ་མིན་ཏང་གཞུང་ནས་ཕེབས་བསུ་དང་སྣེ་ལེན་རྒྱ་ཆེན་པོ་ཞུས། དེ་སྔའི་གོང་མ་མཆོད་ཡོན་གྱི་སྲོལ་བཞིན་གསེར་སམ་དང་གསེར་ཐམ་ཕུལ། རྒྱལ་དབང་ཐུབ་བསྟན་རྒྱ་མཚོ་ཞི་བར་གཤེགས་སྐབས་དགོངས་རྫོགས་ཀྱི་མཆོད་སྤྲིན་རྒྱ་ཆེར་སྤྲོས་ཤིང་། ཡང་སྲིད་མྱུར་འབྱོན་གྱི་གསོལ་འདེབས་བརྩམས། དེ་ནས་ནང་སོག་དང་། ནན་ཅིན། ཧང་ཀྲོའུ། མདོ་སྨད་སོགས་ལ་ཕེབས་ཏེ་བཀའ་ཆོས་མང་པོ་གནང་། སྤྱི་ལོ1933ལོར་ཕྱིར་དབུས་གཙང་དུ་ཕེབས་རྩིས་ཀྱིས་ཁམས་སྐྱེ་དགུ་མདོར་ཕེབས་འབྱོར་སྐབས། བོད་གཞུང་གིས་ཕྱིར་དབུས་གཙང་དུ་ཕེབས་ན་ལྷན་དུ་འོངས་པའི་རྒྱ་དམག་ཕྱིར་སློག་དགོས་པ་དང་། ཡར་ལམ་ལྷ་སར་མི་ཕེབས་པ། སླད་བོད་གཞུང་གི་བཀའ་ལ་སྲུང་རྩི་དང་ལེན་གནང་དགོས་པ་སོགས་དོན་ཚན་གསུམ་བཏོན་པ་དང་། ཉིད་ཀྱི་ཞབས་འབྲིང་པ་འགའ་ཤས་ཀྱི་བྱེད་སྤྱོད་ཀྱི་དབང་དུ་སོང་བ་སོགས་རྐྱེན་སྣ་ཚོགས་ལ་བརྟེན་ནས། དབུས་གཙང་དུ་ཆིབས་བསྒྱུར་ནང་འགྱངས་སུ་སོང་མུར། སྤྱི་ལོ1937ལོར། སྐྱེ་དགུ་མདོའི་ཀླུང་ཤོད་དགོན་དགའ་ལྡན་ཆོས་འཁོར་གླིང་དུ་སྐུ་གཤེགས། སྐུ་གདུང་རི་པོ་ཆེ་གདན་ས་བཀྲ་ཤིས་ལྷུན་པོར་སྤྱན་དྲངས་ཏེ་གསེར་གདུང་སྲིད་གསུམ་མཛེས་རྒྱན་བཞེངས་པ། སྤྱི་ལོ1966ལོའི་བར་འགྲོ་བའི་བསོད་ནམས་ཀྱི་ཞིང་དུ་བཞུགས། པཎ་ཆེན་སྐུ་ཕྲེང་དགུ་པ་འདི་ཉིད་ཀྱི་བརྩམས་ཆོས་ལ། བྱང་ཆུབ་ལམ་གྱི་སྒྲོན་མའི་རྣམ་བཤད་མདོར་བསྡུས་ཐར་ལམ་བགྲོད་པའི་ཐེམ་སྐས། བྱང་ཆུབ་ལམ་གྱི་རིམ་པའི་གནད་བསྡུས་རྒྱུན་འཁྱེར། འདོད་ཁམས་དབང་ཕྱུག་དམག་ཟོར་རྒྱལ་མོའི་ཆོས་སྐོར་གྱི་དཀར་ཆག་མཁའ་འགྲོ་དགྱེས་པའི་སྒྲ་དབྱངས། སོག་ཡུལ་མལ་གྱི་ཨ་ལ་སའི་གཞི་བདག་ལྷ་ཆེན་པོའི་མངོན་རྟོགས་བཤགས་འཕྲིན་བསངས་དང་གསེར་སྐྱེམས་བསྟོན་པ་བཅས་འབུལ་ཚུལ། རྦ་རོང་ཨུ་ཅུམ་ཆིན་ཝང་ཕུགས་ཀྱི་རྒྱབ་རིའི་ཨོ་སྦོག་ལ་གསོལ་མཆོད་བྱ་ཚུལ། སྐུ་འབུམ་གཞི་བདག་ལིའུ་ཆེར་གསོལ་མཆོད་བྱ་ཚུལ་མདོར་བསྡུས། ཤར་ཕྱོགས་མ་ཧཱ་ཙི་ནའི་ཡུལ་གྱི་བུ་ཅའོ་ཧུད་མཐའ་དག་ལ་སྤྲིངས་པའི་བསླབ་བྱ་དགེ་ལེགས་པདྨོ་བཞད་པའི་ཉི་འོད། ཞིང་ཆེན་བུང་ཐན་དུ་རི་པན་གྱ་མི་རིགས་རྣམས་ལ་གདམས་པའི་བསླབ་བྱ་སྐབས་གསུམ་ལམ་སྟོན། རྦ་རོང་སུ་ཉིད་ཐུའི་ཝང་ནས་ཞུས་བསྩལ་མོང་གོལ་སྤྱི་མཐུན་གྱི་སྨོན་ཚིག་འདོད་དོན་རེ་སྐོང་། ལེགས་པར་བཤད་པ་སའི་བསྟན་བཅོས་ལུགས་གཉིས་འོད་བརྒྱ་འབར་བའི་དབྱིག་གི་འཕྲེང་བ། ལེགས་པར་བཤད་པ་ཆུའི་བསྟན་བཅོས་ལུགས་གཉིས་བླང་དོར་ཀུན་གསལ་སོགས་པོ་ཏི་བཞི་བཞུགས་པ་མི་རིགས་དཔེ་མཛོད་ཁང་དུ་བཞུགས་སོ།།

     ཞེས་རོང་ཆེན་ལྷ་རྒྱལ་དཔལ་གྱིས་ཡོང་འཛིན་འཚོལ་བཤེར་དྲ་བ་ལས་བཏུས་སོ།


评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2020-4-9 12:37 , Processed in 0.047766 second(s), 20 queries .

返回顶部