日志

༄༅།། ཆོས་རྒྱལ་སྲོང་བཙན་སྒམ་པོའི་བཙུན་མོ་ ...

已有 73 次阅读2019-12-23 16:49 |系统分类:文化


                                 ༄༅།། ཆོས་རྒྱལ་སྲོང་བཙན་སྒམ་པོའི་བཙུན་མོ་རྣམས་ཀྱིས་བཞེངས་པའི་ལྷ་ཁང་།
                                         ཡོང་ཁུངས།  བོད་ཀྱི་ལོ་རྒྱུས་བྱིས་པའི་དགའ་སྟོན་ལས།
                            
                      
                                                                             ༧ མེས་དབོན་རྣམ་གསུམ་ཞབས་ལ་ན་མོ།

       ཆོས་རྒྱལ་སྲོང་བཙན་སྒམ་པོའི་བཙུན་མོ་རྣམས་ཀྱིས་བཞེངས་པའི་ལྷ་ཁང་རྣམས་ནི།

      ༡ ཆོས་རྒྱལ་སྲོང་བཙན་སྒམ་པོའི་བཙུན་མོ་དང་པོ་མོང་བཟའ་ཁྲི་ལྕམ་ནི། བོད་ཡུལ་དབུས་སུ་མོང་གི་ཁྱིམ་རྒྱུད་དུ་འཁྲུངས། རྒྱལ་བོ་སྲོང་བཙན་སྒམ་པོའི་ཁབ་ཏུ་ཕྱིན། མཛད་རྗེས་གཙོ་བོར་བྲག་ཡེར་པའི་ལྷ་ཁང་བཞེངས། སྐབས་དེར་བན་བོན་གང་གི་ལུགས་ཡིན་མ་གསལ། དེང་དུས་ནང་པའི་ཆོས་ལུགས་ཀྱི་སྒྲུབ་གནས་གྲགས་ཆེ་བ་ཞིག་ཡིན།  
      ༢ རྒྱལ་བོ་སྲོང་བཙན་སྒམ་པོའི་བཙུན་མོ་གཉིས་པ་མི་ཉག་བཟའ་རུ་ཡོང་བཟའ་ནི། མདོ་ཁམས་མི་ཉག་གི་ཡུལ་དུ་འཁྲུངས། ཆོས་རྒྱལ་སྲོང་བཙན་སྒམ་པོའི་ཁབ་ཏུ་ཕྱིན། མཛད་རྗེས་གཙོ་བོར་བྲག་མགོན་པོའི་ལྷ་ཁང་བཞེངས། ལྷ་ཁང་དེ་ཡང་ཐོག་མར་བན་བོན་གང་ཡིན་མ་ངེས་ཀྱང་ཕྱིས་སུ་ནང་པའི་ལུགས་ཀྱི་ལྷ་ཁང་ཞིག་ཡིན་པར་གྲགས།
      ༣ རྒྱལ་པོ་སྲོང་བཙན་སྒམ་པོའི་བཙུན་མོ་གསུམ་པ་ཞང་ཞུང་བཟའ་ལི་ཐིག་སྨན་ནི། གངས་ཏི་སེའི་ཞོལ། མཚོ་མ་ཕམ་པའི་འགྲམ་དུ་ཞང་ཞུང་རྒྱལ་པོའི་སྲས་མོ་་རུ་འཁྲུངས། སྲོང་བཙན་སྒམ་པོའི་སྲིང་མོ་སད་མ་ཀ་ཞང་ཞུང་རྒྱལ་པོའི་བཙན་མོར་ཕྱིན་པ་དང་དུས་མཚུངས་ཙམ་ན། ལི་ཐིག་སྨན་སྲོང་བཙན་སྒམ་པོའི་བཙུན་མོར་བསུས། མཛད་རྗེས་གཙོ་བོར་ཐེམ་བུ་ལྐོག་གི་ལྷ་ཁང་བཞེངས། དེ་ནི་ཞང་ཞུང་བོན་ལུགས་ཀྱི་ལྷ་ཁང་ཞིག་ཡིན་པར་གྲགས་པ་ཙམ་ལས་དེང་དུས་གནས་ཡུལ་གང་ཡིན་ཤེས་མཁན་མེད་པར་སྣང་།
      ༤ རྒྱལ་བོ་སྲོང་བཙན་སྒམ་པོའི་བཙུན་མོ་བཞི་བ་བལ་བཟའ་ཁྲི་བཙན་ནི། དེང་དུས་བལ་བོའི་རྒྱལ་ས་ཀ་ཏེ་མན་ཏུར་བལ་བོའི་རྒྱལ་པོ་འོད་ཟེར་ཁྲི་བཙན་གྱི་སྲས་མོ་རུ་འཁྲུངས།  ཤིང་འབྲུག་སྤྱི་ལོ་༦༣༢ལོར་སྲོང་བཙན་སྒམ་པོའི་ཁབ་ཏུ་ཕེབས། མཛད་རྗེས་གཙོ་བོར་ས་ཕག་སྤྱི་ལོ་༦༣༩ལོར་ར་ས་འཕྲུལ་སྣང་གི་གཙུག་ལག་ཁང་བཞེངས། ལྷ་ཁང་འདི་ནི་བལ་བཟའ་ཁྲི་བཙུན་གྱིས་གདན་དྲངས་པའི་ཇོ་བོ་མི་བསྐྱོད་རྡོ་རྗེའི་སྐུ་རྟེན་བཞུགས་གནས་ཀྱི་ཆེད་དུ་བཞེངས་པ་སྟེ། བོད་དུ་ནང་པ་སངས་རྒྱས་པའི་ཆོས་ལུགས་ཀྱི་ལྷ་ཁང་དང་པོ་ཡིན།
       ༥ རྒྱལ་པོ་སྲོང་བཙན་སྒམ་པོ་བཙུན་མོ་ལྔ་པ་རྒྱ་བཟའ་ཀོང་ཇོ་ནི། རྒྱ་ནག་ཐང་གི་རྒྱལ་པོ་ཐང་ཐའེ་ཙུང་གི་སྲས་མོ་རུ་འཁྲུངས། བོད་ཀྱི་རྒྱལ་པོའི་ཁབ་ཏུ་བཞེས། མཛད་རྗེས་གཙོ་བོར་རྒྱ་སྟག་ར་མོ་ཆེའི་ལྷ་ཁང་བཞེངས། ལྷ་ཁང་འདི་ནི་ལྕགས་ཕག་སྤྱི་ལོ་༦༥༡ལོར་བཞེངས་པར་གསལ། འདི་ནི་རྒྱ་བཟའ་ཀོང་ཇོས་གདན་དྲངས་པའི་ཇོ་བོ་ཤཱཀྱ་མུ་ནེའི་སྐུ་བརྙན་གྱི་བཞུགས་ཡུལ་གྱི་ཆེད་དུ་བཞེངས་པ་ཡིན།
      དཀར་ནག་རྒྱ་དང་བལ་པོ་དང་། ལི་ཡུལ་ལ་སོགས་མཐའ་བཞིར་འབྲེལ། ཞང་གསུམ་བློན་བཞིས་གཙོ་བྱས་པའི། དགུང་ནང་བཀའ་ཡི་བློན་ཆེན་བསྐོས། དབུས་ཀྱི་མདུན་ས་ཆེན་མོ་བཙུགས། མཛངས་བློན་བཞི་པས་བརྡ་སྤྲོད་བརྩམས། ལྔ་པས་རི་ཁྱིམ་ཀླུང་དུ་ཕབ། བོད་ཀྱི་གྲོང་སྡེ་གསར་དུ་བཅོས། ལྕགས་ཁྱིར་སྲོང་བཙན་དགུང་དུ་གཤེགས།
      དེ་ལྟར་ཆོས་རྒྱལ་སྲོང་བཙན་སྒམ་པོའི་སྐབས་སུ་ཤར་ཕྱོགས་ཐང་གི་རྒྱལ་ཁབ་དང་། ལྷོ་རྒྱ་གར། ལྷོ་ནུབ་བལ་པོ། ནུབ་བྱང་ལི་ཡུལ་སོགས་མཐའི་རྒྱལ་ཁམས་རྣམས་སུ་ཆོས་དང་རིག་གནས་ཀྱི་འབྲེལ་བ་བཙུགས། ལྷག་པར་དུ་རྒྱ་གར་ནས་སྤྱན་རས་གཟིགས་ཀྱི་མདོ་རྒྱུད་ཉེར་གཅིག་སོགས་གདན་དྲངས་ནས་བོད་ཡིག་ཏུ་བསྒྱུར་ནས་ནང་ཆོས་བོད་དུ་དར་བའི་དབུ་བརྙེས་ཤིང་། ཞང་གསུམ་བློན་བཅས་དབུས་ཀྱི་འདུན་ས་འཛིན་ཞེས་པའི་ཞང་གསུམ་བློན་དང་བཞི་ནི། ༼མཁས་པའི་དགའ་སྟོན༽ལས། སྟོད་ན་འབྲོ་རྒྱལ་མཚན་སེང་གེ སྨད་ན་མཆིམས་སྐྱེས་བཟང་སྟག་སྣ། བར་ན་སྣ་ནམ་རྒྱལ་རྒན། བློན་པོ་སྦས་སྐྱེས་བཟང་སྟག་སྣ་བཅས་ཞང་གསུམ། བློན་པོ་གཅིག་བཅས་བཞི་ལ་ཞང་གསུམ་བློན་བཞི་ཟེར། ཞེས་གསལ། ཡང༼ལྡེའུ་ཆོས་འབྱུང༽ནང་། ཞང་གསུམ་ནི། སྣ་ནམ། མཆིམས། འབྲོ་གསུམ་དང་། བློན་བཞི་ནི། ཁུ་དང་། མགར། སྦས། འགོས་བཅས་ཡིན། ཞེས་གསལ། དཔོན་རིགས་དེ་དག་གིས་གཙོ་བོར་བྱས་པའི་སྲིད་སྐྱོང་བའི་སྒྲིག་གཞི་རིམ་པ་མི་འདྲ་བ་དང་། ལས་འགན་མི་འདྲ་བའི་གྲོས་ཚོགས་ཁག་ནི། དགུང་བློན་བཞི་ནི། སྲོང་བཙན་སྒམ་པོའི་སྐབས་སུ་དགུང་བློན་ཆེ་བ་བཞིའམ་མེད་ཐབས་མེད་པའི་བློན་ཆེན་བཞི་ནི། མགར་སྟོང་བཙན། ཐུ་མི་སམྦྷོཊ། འབྲི་སེ་རི་གུང་ཐུན། སྙགས་ཁྲི་བཟང་ཡང་སྟོན་བཅས་ཡིན། དགུང་བློན་འོས་འགན་ནི། ཕྱིའི་དགྲ་འདུལ་ཞིང་། ཆོས་དང་རིག་གནས་སྤེལ་བའི་ཐབས་ཇུས་བསྐྱང་དགོས་པའོ།།

      ཞེས་རོང་ཆེན་ལྷ་རྒྱལ་དཔལ་གྱིས་བོད་ཀྱི་སློབ་འབྲིང་དྲ་བ་ལས་བཏུས་ཏེ་བསྒྲིགས་སོ།



评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2020-4-8 00:00 , Processed in 0.052738 second(s), 20 queries .

返回顶部