博客西藏在最高处过一种生活

日志

༄༅།།ལོ་སྐོར་ལུས་ཀྱི་སྐེད་པར་འདོགས་དགོས་པ ...

已有 92 次阅读2019-5-22 19:13 |系统分类:文化


                                      ༄༅།།ལོ་སྐོར་ལུས་ཀྱི་སྐེད་པར་འདོགས་དགོས་པའི་རྒྱུ་མཚན།
                               ཡོང་ཁུངས། ཁམས་པའི་དྲ་བའི་འཕྲིན་སྟེགས་ལས། རྩོམ་པ་པོ། ལྟག་ཨོ་རྒྱན་ཆོས་འཕེལ།

                                


      ལོ་སྐོར་བཅུ་གཉིས་ཀྱི་མེ་ལོང་འདི་བྱུང་ན་ངེས་པར་དུ་ལུས་ཀྱི་སྐེད་པའི་མཚམས་སུ་འདོགས་དགོས་ཏེ། གཞན་སྤྱི་བོ་དང་། མགྲིན་པ་དང་། རྐང་ལག་སོགས་ལ་འདོགས་མི་རུང་བ་ཞིག་ཡིན།<ལོ་སྐོར>ལ་དབྱིབས་སྒོར་སྒོར་དང་གྲུ་བཞི་ཅན་གཉིས་དང་། ཆེ་ཆུང་ཅི་རིགས་ཡོད། ལོ་སྐོར་གྱི་རྒྱུ་ཆ་ལ་ལི་དང་། ཟངས་དང་། གསེར་དང་། དངུལ་དང་། ར་གན་དང་། ལྗུན་དང་། ཛེ་ཁྱིམ་དང་། ཁྲོ་སོགས་ཡོད་དོ།། 
     <ལོ་སྐོར་མེ་ལོང>ནི་སྲིད་པའི་རུས་སྦལ་གན་རྐྱལ་དུ་བཀོད་པའི་ལྟོ་བའི་ངོས་སུ་སྨེ་བ་དགུ་དང་སྤར་ཁ་བརྒྱད་དང་། ལོ་རྟགས་བཅུ་གཉིས་དང་། འབྱུང་བ་ལྔ་སོགས་འཁོར་ལོའི་རིམ་པ་བཞིན་དུ་འཇོག་ཡོད་པ་ཞིག་ཡིན། མེ་ལོང་གི་ལྟོ་བའི་ཕྱོགས་ཀྱི<མོ་ཁམས>དང་། སྒལ་པའི་ཕྱོགས་ཀྱི<ཕོ་ཁམས>གཉིས་མདུན་རྒྱབ་ཀྱི་ཚུགས་སུ་བཅད་དེ། སྲིད་པའི་རླུང་ནས་གཡོ་བའི་སྐབས་ཕོ་མོའི་ནུས་པ་གཉིས་གཞི་གཅིག་ཏུ་སྦྱོར་བར་བྱེད་དོ།།
      གལ་ཏེ། འཇོན་ན་མི་སོ་སོ་ལ་རང་རང་གི་ལོ་ཁམས་དང་མཐུན་པའི་མེ་ལོང་རེ་དགོས་མོད། ཡིན་ནའང་། དེ་འདྲའི་མཐུན་རྐྱེན་འཛོམས་པ་དཀའ་བའི་ཕྱིར། ཤེས་རབ་ལྷ་ནས་འབྱུང་རྩིས་ཐོག་མར་བསྟན་པའི་སྐབས་ཀྱི་སྨེ་བའི་བཀོད་ལུགས་གཞི་བཞག་སྟེ་ལྔ་སེར་རུས་སྦལ་ལྟོ་ལ་ཕོག་པའི་ལོ་སྐོར་འདི་ཉིད་དེ་སྤྱི་སྤྱོད་ཀྱི་ཚུལ་དུ་འཇོག་ཡོད། དེ་ལ་འབྱུང་རྩིས་མཁན་པོ་རྣམས་ནས་ཀྱང་ནུས་པ་ཐད་དུ་སྨིན་ཐུབ་པའི་སྨོན་ལམ་ཡང་ཡང་བཏབ་ཡོད། 
      ལོ་སྐོར་མེ་ལོང་འདི་ལུས་ཀྱི་སྐེད་པར་འདོགས་དགོས་པའི་རྒྱུ་མཚན་ནི་ཁྱུང་ཆེན་གྱིས་གནམ་ས་ཁ་ཕྱེ་བའི་སྲིད་པ་ཆགས་ལུགས་ཀྱི་བཤད་སྲོལ་ལས་བྱུང་སྟེ། ཁྱུང་ནས་གནམ་ས་གཉིས་ཁ་ཕྱེ་བ་དང་། ཐམས་ཅད་མངོན་པར་གསལ་བ། སྣོད་བཅུད་ཀྱི་གོ་རིམ་ཡང་མི་ནོར་བ་བསྟན་ཞིང་། དེ་བཞིན་དུ་གྱུར་པ་ནི་གནམ་ས<ཕོ་མོ>གཉིས་དེ་རབ་འབྱམས་ཀློང་སྒོང་གི་གཞི་དཀྱིལ<ལྟེ་བ>ནས་སྟོད་སྨད་དུ་བཅད་པ་ཡིན་པས། ནུས་པ་དེ་གཉིས་ཀྱི་ཆེ་ཆུང་རྒྱ་མ་ནང་བཀྱག་པ་ལྟར་ཡོ་ཀྱོག་སྤུ་ཙམ་མེད་དོ།། དེ་ནི་ཚངས་ཐིག་གི་གནས་ལུགས་དང་ཡོངས་སུ་མཐུན་ཞིང་། དྲང་པོ་དྲང་བཞག་གི་བཤད་པ་དང་གཅིག་མཚུངས་སུ་གྱུར་རོ།། 
      འདི་ཡང་སྣོད་བཅུད་བརྟན་པོར་གནས་པ་ལ<རྒྱུ་འབྲས>ཀྱི་ལེའུ་ལ་བརྩི་སྲུང་བྱེད་དགོས་པའང་མངོན་ནོ།།
      སྣོད་བཅུད་བདེ་བར་གནས་པ་ལ་ཐམས་ཅད་ཁོད་སྙོམས་པ་ཞིག་དགོས་ཏེ། དེ་མིན་འབྱུང་བ་རྣམས་འཁྲུག་གྱུར་ཏེ། མྱ་ངན་དང་སྡུག་བསྔལ་བའོ།། དེར་བརྟེན། ལོ་ཁམས་སྤར་ཁ་དང་སྨེ་བ་རྣམས་གསལ་ལྷང་ངེར་བསྒྲིགས་ཡོད་པའི་མེ་ལོང་འདི་ངེས་པར་དུ་མིའི་ལུས་ཀྱི་སྐེད་པའི་མཚམས་སུ་བཏགས་དགོས། དོན་དུ་མིའི་སྐུ་ལུས་ཆ་ཚང་སྲིད་པའི་ཀློང་སྒོང་དང་གཅིག་སྟེ། ལུས་འདི་ཡང་ལྟེ་བ་ནས་ཚངས་ཐིག་ལྟར་ཁོག་སྟོད<གནམ>དང་ཁོག་སྨད<ས>རུ་བགོས། འདི་སྣོད་བཅུད་ཀྱི་བཀོད་པ་ཡང་ལྟེ་བའི་མཚམས་ནས་ཁ་གསལ་མོར་བཀྲ་བའི་ལུགས་དང་མཐུན། རྒྱུ་མཚན་འདི་ལྟར་གྱིས<ལོ་སྐོར་མེ་ལོང>འདི་ལུས་ཀྱི་སྐེད་པའི་ཕྱོགས་སུ་འདོགས་དགོས་སོ།། དེ་ལྟར་དུ་བྱེད་གྱུར་ན་ཕན་ནུས་དང་དགེ་བ་དཔག་ཏུ་མེད་པའོ།། དེ་ལ་གཟབ་འཚལ་ལོ།། དགེའོ།།
      མཆན།
      1.  དེང་སང་བོད་ཀྱི་རིག་གནས་ཉམས་དམས་སུ་གྱུར་ཟིན་པའི་རྒྱུ་མཚན་གྱིས་སྤྱི་ཚོགས་ཐོག་བོད་ཀྱི་ཅ་དངོས་སྣ་ཚོགས་ཆོ་མེད་ལུགས་མེད་དུ་སྤྱད་པར་བྱ་བ་མང་། དེའི་ནང་ལོ་སྐོར་མེ་ལོང་གང་འོས་སུ་འདོགས་མཁན་མང་པོ་ཞིག་མཐོང་། དེ་བཞིན་གནས་དང་ཡུལ་མ་ཡིན་པར་མེ་ལོང་འདོགས་ན་ཕན་པ་ལས་གནོད་ཆེའོ།། 
      2 . ལོ་སྐོར་མེ་ལོང་དང་ཁྱུང་གིས་གནམ་ས་འབྱེད་པའི་རིག་གཞུང་གཉིས་འབྲེལ་བ་ཡོད་པ<མེ་ལོང་ཁྱུང་རྒྱན་མ>ལ་གཟིགས་ན་གསལ་པོར་ཤེས་ཐུབ། ཁྱུང་རྒྱན་མ་ནི་མེ་ལོང་ཆ་ཚང་བྱ་ཁྱུང་གིས་སྡེར་མོ་ནས་འཛིན་པ་ཞིག་ཡིན། སྐབས་རེར་བྱ་ཁྱུང་གི་ཚབ་ཏུ་རྨ་བྱ་ཡང་འཇོག་སྲོལ་ཡོད།
      ཞེས་ཆེན་ལྷ་རྒྱལ་དཔལ་གྱིས་ཀྲུང་གོའི་བོད་ཀྱི་དྲ་བ་ལས་བཏུས་སོ།


评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2019-8-19 05:50 , Processed in 0.024074 second(s), 21 queries .

返回顶部