博客西藏在最高处过一种生活

日志

༄༅།།བོད་ཀྱི་རིགས་རུས་སོ་སོའི་བླ་ཟོག ... ... . ...

已有 108 次阅读2019-3-11 09:08 |系统分类:文化


                                                        ༄༅།།བོད་ཀྱི་རིགས་རུས་སོ་སོའི་བླ་ཟོག                                                                            ཡོང་ཁུངས། བོད་ཀྱི་ལོ་རྒྱུས་ཀུན་དགའི་མེ་ལོང་ལས་བཏུས། རྩོམ་པ་པོ། མི་གསལ། 

                                                     
        བོད་ཀྱི་རུས་ཆེན་བཞི་ལས་རིགས་བཟང་ལྔ་བསལ་བ་ནས་བཟུང་རང་རང་གི་བླ་ཟོག་ཡོད་དེ། ལྡོང་གི་བླ་ཟོག་ཤ་བ། འབྲིའི་བླ་ཟོག་གཡག སྦྲའི་བླ་ཟོག་རྐྱང་། སྒའི་བླ་ཟོག་ལུག  སྒོའི་བླ་ཟོག་ར་ཡིན་ལ། ཆུ་ནག༼ ཁྲོ་ཆུ ༽གི་སྒོའི་རིགས་རྣམས་ཀྱི་བླ་ཟོག་ར་ཡིན་པས། ཁང་ཐོག་ཏུ་ར་མགོ་འབྲི་བའང་བཅའ། དེའི་རྒྱུ་མཚན་གྱིས་དེ་དག་གི་ཡུལ་ལུང་ལ་ར་མགོའི་ཁོག་ཟེར། ཆུ་ནག་གི་འབྲི་ཡི་རིགས་རྣམས་ཀྱི་བླ་ཟོག་གཡག་ཡིན་པས། ཁང་ཐོག་ཏུ་གཡག་མགོ་འབྲི་བའམ་བཅའ་བར་བྱེད་པས། དེ་དག་གི་ཡུལ་ལ་གཡག་མགོའི་ཁོག་ཅེས་གྲགས་སོ། །

                                                    
        གཞན་ཡང་བོད་ཀྱི་མིའུ་གདོང་དྲུག་གི་རུས་མཛོད་ལས། སྔོན་བོད་འདིར་དུས་ཆེན་ལྔ་འདི་བྱུང་བ་ནས་བཟུང་། རང་རང་གི་བླ་ཟོག་དེ་ནི། ལྡོང་གི་ཤ་བ། འབྲིའི་གཡག   སྦྲའི་རྐྱང་། སྒའི་ལུག སྒོའི་བླ་ཟོག་ར་ཡིན་པར་བཞེད་སྲོལ་དེ་བཞིན་ཞེས་གསུངས་པ་ལྟར། རྟ་དམག་ཡུལ་འདིའི་ཚོ་བ་བཅུ་དགུའི་བླ་ཟོག་གཡག་ཡིན་ལ། ཚོ་བ་བཅོ་བརྒྱད་ཀྱི་བླ་ཟོག་ར་ཡིན་སྟབས།གཟུགས་རིས་ཀྱང་འབྲི་བཅོས་བགྱིད་སྲོལ་ཡོད་པས། ཚོ་བ་བཅུ་དགུ་ནི་བོད་ཀྱི་ཨ་ལྕགས་འབྲིའི་རིགས་ཡིན་པ་དང་། ཚོ་བ་བཅོ་བརྒྱད་ནི་ལྷ་རིགས་སྒོའི་རིགས་ཡིན་པར་གསལ་ལོ།། ཡུལ་དེ་དག་གི་ཚོ་བ་ལ་ལའི་བླ་ཟོག་གཡག་ཡིན་པ། ཚོ་བ་ལ་ལའི་བླ་ཟོག་ར་ཡིན་སྟབས། གཟུགས་རིས་ཀྱང་འབྲི་བཅོས་བགྱིད་སྲོལ་ཡོད་པས། ཚོ་བ་དེ་དག་གི་ལ་ལ་ཨ་ལྕགས་འབྲིའི་རིགས་ཡིན་པ་དང་། ལ་ལ་ལྷ་རིགས་སྒོའི་རིགས་ཡིན་པར་གསལ་ལོ། །ཡང་རུས་མཛོད་ལས་རིགས་བཟང་ངན་གཉིས་སུ་དབྱེ་བ་ནས་བཟུང་སྟེ། རང་ཚན་རང་ཚན་དེ་རྣམས་རང་ཚན་བྱས་ནས་ཕན་ཚུན་མ་འདྲེས་པར་ཡུན་དུ་གནས་པ་ལ། ཆོས་ཀྱི་སྦྱིན་པའི་སྐབས་སུ་རིགས་བཟང་ངན་ཡང་ཤེས་པར་མངོན་ལ། དེ་ནས་རིགས་བཟང་པོ་རྣམས་ཀྱིས་རང་ཤུགས་ཀྱིས་རིགས་རྣམས་སྒྲུབ་ལ། དེས་བོད་ཀྱི་ཡུལ་ལྷ་རྣམས་དྭངས་པ་ཆེན་པོས་མཆོད་པས། ད་དག་རྣམས་ལ་ཞིང་བོ་སྒོ་ཞེས་ཟེར་ལ། ཕྱིས་སུ་དེ་རྣམས་ཀྱི་རིགས་ལ་ཞིང་བོ་ལྷ་རིགས་སྒོ་དང་། བསྭེ་ཡི་ནང་གི་རིགས་བཟང་གཙོ་བོ་རྣམས་ལ་བསྭེ་ཆུང་༼ཁྱུང༽སྦྲ། དེ་བཞིན་དུ་སྨུ་ཡི་ནང་གི་རིགས་བཟང་གཙོ་བོ་རྣམས་ལ་རིགས་བཟང་གཙོ་བོ་རྣམས་ལ་སྨུ་ཚ་སྒ། ལྡོང་གི་ནང་གི་རིགས་བཟང་གཙོ་བོ་རྣམས་ལ་ཨ་སྤོ་ལྡོང་། སྟོང་གི་ནང་གི་རིགས་བཟང་གཙོ་བོ་རྣམས་ལ་ཨ་ལྕགས་འབྲིའོ། །ཞེས་གསུངས་པ་དང་།

                                                   

                                                   
      ཡང་རུས་མཛོད་དེ་ལས། རུས་ཆེན་འདི་དག་ལ་དོན་གྱི་མིང་ཡང་འདི་ལྟར་ཡོད་ལ། ལྡོང་ཆེ་གཉན་ཅན་ཞེས་རྒྱལ་ཆེན་མི་བཞི་སོགས་བྱུང་བ་ཆེ་གཉན་ཆེ་བ། འབྲི་བྱས་པ་ཅན་ཞེས་དགྲ་ལ་རྒོད་པ། སྒ་ཡིག་ཚང་ཅན་ཞེས་སློབ་གཉེར་ལ་མཁས་པ། སྦྲ་མི་སྣ་ཅན་ཞེས་ཕྱུག་དཔལ་ཆེ་བ།ཞིང་སྒོ་ཞེས་པ་ལྷ་རིགས་དང་ལྔ་ལ་རུས་ཆེན་སྡེ་ལྔ་ཟེར་ཞེས་གསུངས་པ་ལྟར། བླ་ཟོག་ར་ཡིན་པའི་ཞིང་སྒོའི་རིགས་ནི་ལྷ་རིགས་ཡིན་པས། ལྷ་དགྱེས་ས་ཡིན་སྙམ་པ་དང་། བླ་ཟོག་གཡག་ཡིན་པའི་ཨ་ལྕགས་འབྲིའི་རིགས་ནི། འབྲི་བྱས་པ་ཅན་ཞེས་དགྲ་ལ་རྒོད། ཅེས་ཟེར་བ་ལྟར་དཔའ་བོ་ཡིན་པས། རིགས་དེ་གཉིས་ཀྱིས་རྟ་དམག་བསྒྲིགས་ནས་རྒྱ་བོད་སོ་མཚམས་ཝེ་ཀྲུའུ་སོགས་སུ་བཞག་པའི་རྒྱུ་མཚན་གྱིས། མིངས་ལའང་རྟ་དམག་ཅེས་གྲགས་སོ། །དཔའ་བོ་ཡིན་པར་གྲགས་སོ། །གཞན་ཡང་། རུས་མཛོད་ལས། སྒོའི་བླ་ཟོག་ར་དང་མེ་ཁམས་ཡིན་པ་དང་། འབྲིའི་བླ་ཟོག་གཡག་དང་ཆུ་ཁམས་ཡིན་པས། ལ་བོང་གི་ར་གཡག་གི་ཤོག་གཉིས་ལའང་དེ་ལྟ་བུའི་བཤད་ཚུལ་ཡོད་འདུག

                                                    
       
       བོད་ཀྱི་གོམས་གཤིས།ས་མཐོར་ཕྱུགས་འཚོ་སྐྱོང་གི་སྐབས་ར་ལུག་གི་སློག་པ་ཁོད་ཡངས་ཤིང་ཕུ་རུང་ཆེ་བ་གྱོན་པ་དང་། དམག་ལ་འགྲོ་སྐབས་སྟོད་ཐུང་དོར་མ་སྟབས་བདེའི་སྟེང་དུ་བེར་དང་ཁྲབ་རྨོག་གྱོན་པ་དང་། ཁྲི་དཔོན་གྱིས་སྟག་ལྤགས་ཀྱི་སྟོད་ཐུང་། སྟོང་དཔོན་གྱིས་གཟིག་ལྤགས་ཀྱི་སྟོད་ཐུང་། དམག་དམངས་ཀྱིས་ར་ལུག་གི་པགས་པའི་སྟོད་ཐུང་གྱོན་ཞིང་། ནང་གོས་ལ་ཕུ་རུང་ཡོད་ལ། སྟོད་ཐུང་ལ་ཕུ་རུང་མེད་པ་ནི། གྲི་མདུང་དབྱུག་བདེ་བའི་ཆེད་ཡིན་ལ། ཐང་མཚམས་སུ་དམག་ལ་ཡོང་སྐབས་ནགས་ཚལ་ནང་ནས་འབུད་ཤིང་གཅོད་བྱེད་གྲི་ཐུང་དང་། དགྲ་ལ་འཐབ་བྱེད་གྲི་རིང་ཡོད་པ། གློ་གཡས་སུ་མེ་ཆ་ལ་གཡུ་བྱུར་གྱི་ཕྲས་བརྒྱན་པ་འདོགས་པ་སོགས་བོད་སྤྱིའི་གོམས་ལུགས་ཡིན་པ་ལྟར། ལ་བོང་ཡུལ་ཚོའི་གོམས་གཤིས་ཀྱང་དེ་འདྲ་ཡིན་སྟབས། དེས་ཀྱང་བོད་རིགས་ཡིན་པ་ཤེས་ནུས་སོ། །
      ཞེས་རོང་ཆེན་ལྷ་རྒྱ་དཔལ་གྱིས་ཀྲུང་གོའི་བོད་ལྗོངས་དྲ་བ་ལས་བཏུས་སོ།



评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2019-5-27 02:59 , Processed in 0.048801 second(s), 21 queries .

返回顶部