博客西藏在最高处过一种生活

日志

༄༅།།བཀྲ་ཤིས་རྟགས་བརྒྱད།

已有 91 次阅读2019-2-9 11:38 |系统分类:文化


                                                      ༄༅།།བཀྲ་ཤིས་རྟགས་བརྒྱད།
                                                
                                                  
       སྤྱིར་རྟགས་བརྒྱད་དེ་ཡུལ་དུས་གནས་སྐབས་ཀུན་དང་བྱ་བ་ཆེ་ཆུང་། སྤྱི་སྒེར། མི་ཆོས་དང་ལྷ་ཆོས་གང་ཡིན་ཡང་ཁ་དགེ་བཀྲ་ཤིས་ཡོང་བའི་མཚོན་དོན་ཡིན་པ་ལ་ཐེ་ཚོམ་མེད་པ་ཕ་ཚ་བུ་རབས་ནས་བཞག་པའི་བག་ཆགས་བརྟན་པོའི་རྗེས་འགྲོ་བྱེད་ཀྱི་ཡོད་པ་སྨོས་མེད་རེད། དེ་ལྟར་བྱེད་དགོས་དོན་ནི། ཚད་ལྡན་གྱི་ལོ་རྒྱུས་དང་མ་འབྲེལ་བར་གནའ་བོའི་མི་རྣམས་ཀྱིས་རྒྱུ་མཚན་མེད་པར་རྨོངས་པའི་མོས་ཕྱོགས་ཙམ་གྱིས་མི་ཡི་འཚོ་བའི་ནང་རྒྱུན་ཆགས་སུ་གནས་པ་ཤིག་མ་ཡིན་པར། ཁུངས་ལྡན་ལོ་རྒྱུས་དང་འབྲེལ་བའི་བོད་ཀྱི་སྲོལ་རྒྱུས་རིག་གནས་ཀྱི་སྣ་བརྒྱའི་མེ་ཏོག་བཞད་པའི་སྐྱེད་ཚལ་དུ་མཛེས་སྡུག་རྣམ་པར་བཀྲ་བའི་མེ་ཏོག་ཨུཏྤལ་ཞིག་དང་གཉིས་སུ་མ་མཆིས།

      བཀྲ་ཤིས་རྟགས་བརྒྱད་ནི་བོད་མི་རིགས་ཀྱིས་ཁ་དགེ་བཀྲ་ཤིས་ཡོང་བའི་མཚོན་རྟགས་གཙིགས་ཆེ་ཤོས་ཤིག་འཛིན་གྱི་ཡོད་པ་ནི། ཆོས་ལུགས་ཀྱི་ལྟ་བ་ཡོད་མེད་ལ་མ་ལྟོས་པར་བོད་ཀྱི་སྲོལ་རྒྱུན་རིག་གནས་ལ་དགའ་ཞེན་ཡོད་རིགས་ཚང་མ་གཅིག་གྱུར་ཡིན། བཀྲ་ཤིས་པའི་རྟགས་བརྒྱད་འདི་ཆེ་ས་དགོན་གྱི་གཙུག་ལག་ཁང་དང་ལྷ་ཁང་ཆེ་ཆུང་རིགས་ཀུན་དང་བླ་བྲང་། གྲྭ་ཤག མགྲོན་ཁང་བཅས་དང་། རྒྱལ་པོའི་ཕོ་བྲང་། སྤྱིར་བཏང་གྲོང་པའི་སྡོད་ཁང་། ཁྲིམས་སྲིད་སྡེ་ཚན་གྱི་ཚོགས་ཁང་། སྤྲོ་སྐྱིད་ཁང་། གཞན་རས་གུར་བཅས་ཚང་མའི་ཕྱི་ནང་གང་སར་རི་མོའི་ལམ་དང་། རྒྱུ་ཆ་སྣ་ཚོགས་ཀྱིས་གྲུབ་པའི་དབྱིབས་གཟུགས་ལས་གྲུབ་པ་བཤམས་སྒྲིག་བྱེད་ཀྱིན་ཡོད། དེ་ཡང་སེར་སྐྱ་ཀུན་གྱིས་བཀྲ་ཤིས་པའི་རྟགས་བརྒྱད་པོ་རེ་རེས་ཐུན་མོང་མ་ཡིན་པའི་མཚོན་དོན་རེ་ཡོད་པ་ཤེས་མིན་ལ་མ་ལྟོས་པར། སྤྱིར་བཀྲ་ཤིས་རྟགས་བརྒྱད་དེ་ཡུལ་དུས་གནས་སྐབས་ཀུན་དང་བྱ་བ་ཆེ་ཆུང་། སྤྱི་སྒེར། མི་ཆོས་དང་ལྷ་ཆོས་གང་ཡིན་ཡང་ཁ་དགེ་བཀྲ་ཤིས་ཡོང་བའི་མཚོན་དོན་ཡིན་པ་ལ་ཐེ་ཚོམ་མེད་པ་ཕ་ཚ་བུ་རབས་ནས་བཞག་པའི་བག་ཆགས་བརྟན་པོའི་རྗེས་འགྲོ་བྱེད་ཀྱི་ཡོད་པ་སྨོས་མེད་རེད།   

      བཀྲ་ཤིས་རྟགས་བརྒྱད་ཀྱི་བྱུང་བའི་ཐད་བན་བོན་གཉིས་ལ་རང་རང་གི་བཤད་ཚུལ་མི་འདྲ་བ་རེ་འདུག་སྟེ། ནང་བ་བས་བཀྲ་ཤིས་རྟགས་བརྒྱད་ནི་ཚངས་པ་ལ་སོགས་པས་སངས་རྒྱས་ལ་ཕུལ་བ་དང་སངས་རྒྱས་རང་གི་སྐུ་ལ་དབུ་གདུགས་ལྟར་དུ་ཡོད་པ་སོགས་བསོད་ནམས་དང་ཡེ་ཤེས་ཀྱི་རང་རྩལ་ལས་སོ་སོའི་མཚན་མ་ཡོད་པ་དེ་དང་དེ་ལ། རང་གཞན་གྱི་བསོད་ནམས་བསག་པའི་སླད་དུ་ལྷག་པ་གཟུགས་བརྙན་གྱི་དམིགས་རྟེན་ཙམ་དུ་འབུལ་བའི་སྲོལ་བྱུང་བ་ཡིན།

      བོན་ལྟར་ན། བོད་ཀྱི་ཐུན་མིན་ཆོས་དང་རིག་གནས་སྲོལ་རྒྱུན་བཟང་པོ་ཀུན་གྱི་མེས་པོ་ནི་བོན་སྟོན་གཤེན་རབ་མཆོག་ཡིན་པས་ད་ལན་རྟགས་བརྒྱད་འདི་ཡང་བཀྲ་ཤིས་པའི་མཚོན་རྟགས་སུ་ཇི་ལྟར་གྱུར་ཚུལ་ཡང་བོན་སྟོན་གཤེན་རབ་མཆོག་གི་མཛད་རྣམ་ལས་བཀྲ་ཤིས་པའི་ལྷ་མོ་བརྒྱད་ཀྱིས་སྟོན་པ་ལ་བཀྲ་ཤིས་གསོལ་བའི་རིམ་པ་ལྟར་དང་མཁན་ཆེན་ཉི་མ་རིན་པོ་ཆེས་མཛད་པའི་བྱམས་མའི་རྒྱན་མཆོད་ཨུཏྤལ་དཀར་པོའི་ཕྲེང་བའི་ནང་གི་རིམ་པ་ཡང་དེ་དང་མཐུན་པར་བཀོད་འདུག་པས་དེ་གཉིས་ལྟར་འགོད་པར་བྱ།

       གདུགས།

      གདུགས་དཀར་པོ་གསེར་གྱི་ཡུ་བ་ཅན་དར་མཚོན་སྣ་ཚོགས་ཀྱི་འཕུར་ལྡིང་གཡོ་བ་རིན་པོ་ཆེའི་ཏོག་གིས་མཛེས་པ་དང་དབུ་ལ་ཕུལ་བས་རང་གཞན་སེམས་ཅན་ཐམས་ཅད་ཉོན་མོངས་པའི་ཚ་གདུང་ལས་སྐྱོབ་པ།

      བོན་སྟོན་གཤེན་རབ་མཆོག་དགུང་ལོ་ཞེ་དགུའི་ཐོག་མི་གཡོ་བསམ་གཏན་གླིང་དུ་གཡེང་བའི་ཚོགས་སྤང་དབེན་པའི་གནས་བརྟེན་ཏེ། ཚིག་བོར་དོན་ལ་བསྒོམས་ཏེ་གཞི་ལམ་འབྲས་བུའི་བོན་རྣམས་གཏན་ལ་ཕབས་ནས་སྒོམ་པའི་ཐོག་བར། ལྷ་མོ་གདུགས་ཅན་མས་དབུ་ཡི་མཁའ་ལ་གདུགས་ཕུབ་ཏེ་དབུ་གདུགས་ལྟར་ཀུན་གྱི་བླ་ན་མཐོ་བའི་བཀྲ་ཤིས་གསོལ་བ་ནས་གདུགས་འདི་ཉིད་དབུ་འཕང་དགུང་དང་མཉམ་པར་བཀྲ་ཤིས་པའི་མཚོན་བྱེད་ཞིག་ཏུ་གྱུར་པ་ཡིན།

      གསེར་ཉ།

     གསེར་ཉ་གཡུ་ཡི་གཤོག་པ་ཅན་མཉེན་ཞིང་ལྕུག་པ་སྤྱན་ལ་ཕུལ་བས་ཤེས་རབ་ཀྱི་མིག་ཐོབ་པ།

     གཤེན་རབ་དགུང་ལོ་སོ་བདུན་ཐོག་རི་བདུན་ཁ་རུ་བྱོན་ཏེ་གཡུང་དྲུང་ཁྱིམ་བདུན་མི་ཡི་ནང་དུ་གཡུང་དྲུང་རྨད་དུ་བྱུང་བའི་རྒྱུད་གསུངས། ཉ་ཅན་ལྷ་མོས་དེ་དུས་གསེར་ཉ་ཟུང་གཅིག་ཕུལ་ནས་ཕྱག་ལ་གསེར་ཉ་ལྟ་བུ་མཉེན་ཞིང་བདེ་བའི་བཀྲ་ཤིས་གསོལ་བས་གསེར་ཉ་འདི་ཉིད་ཕྱག་མཉེན་ཞིང་བདེ་བར་ཡོང་བའི་བཀྲ་ཤིས་གསོལ་བའི་མཚོན་རྟགས་ཞིག་ཏུ་ཆགས་པ་ཡིན།

      པདྨ།

     འདབ་སྟོང་རྣམ་པར་བཀྲ་བ་དྲི་བཟང་དང་ལྡན་པའི་མེ་ཏོག་པདྨ་ལྗགས་ལ་ཕུལ་བས་པདྨ་ལ་ཆུ་མི་ཆགས་པ་ལྟར་འཁོར་བ་ལ་གནས་ཀྱང་འཁོར་བའི་སྐྱོན་གྱིས་མི་གོས་ཤིང་ཚེ་རབས་ཀུན་ཏུ་རྫུན་སྤངས་པའི་ལྗགས་པདྨ་ལྟ་བུ་ཐོབ་པ།

     གཤེན་རབ་དགུང་ལོ་ལྔའི་ཐོག་ནམ་མཁར་འཕུར་ནས་ལྷ་གནས་གཡུང་དྲུང་གསལ་བྱེད་གླིང་དུ་གཡུང་དྲུང་གསལ་སྨྲ་ཡོད་ཁམས་ཀྱི་རྒྱུད་གསུངས་ཏེ་ལྷ་ལ་བོན་འཁོར་སྐོར་ སྐབས། ལྷ་མོ་པདྨ་མས་མེ་ཏོག་པདྨའི་མདངས་ཕུལ་ཏེ་གདན་ལ་པདྨ་ལྟ་བུའི་འཁོར་བའི་ཉེས་སྐྱོན་དང་བྲལ་བའི་བཀྲ་ཤིས་གསོལ། དེ་ནས་པདྨ་འདི་ཉིད་གདན་ལ་ཉེས་སྐྱོན་བྲལ་ཞིང་སྐུ་ཚེ་འཇིག་བྲལ་ཞབས་པད་བསྐལ་བརྒྱར་བརྟན་པའི་མཚོན་རྟགས་ཞིག་ཏུ་གྱུར་བ་ཡིན།

      དུང་དཀར།

     བྱང་ཆུབ་སེམས་དཔའ་གཞན་དོན་དུ་སྐྱེ་བ་བཟུང་བའི་བཀྲ་ཤིས་ཆོས་དུང་གཡས་སུ་འཁྱིལ་བ་ཚེམས་ལ་ཕུལ་བས་ཚེམས་ཕྲེང་བཞི་བཅུ་མངོན་ཞིང་རོ་བྲོ་བའི་མཆོག་ཐོབ་ཅིང་དུང་གི་ཚེམས་བར་ནས་དམ་པའི་ཆོས་ཀྱི་སྒྲ་དབྱངས་སྒྲོག་པ།

     བོན་སྟོན་གཤེན་རབ་མཆོག་དགུང་ལོ་ཞེ་གཅིག་ཐོག་གསས་མཁར་ཁྲི་སྨོན་རྒྱལ་བཞད་ཀྱི་ནང་དུ་གཡུང་དྲུང་ཁྲི་སྨོན་རྒྱལ་བའི་རྒྱུད་བཤད་ནས་བོན་སྒྲས་འཇིག་རྟེན་ཁྱབ་ པར་གྱུར་སྐབས། ལྷ་མོ་དུང་ཅན་མས་གསུང་ལ་འགག་པ་མེད་པར་བཀྲ་ཤིས་པའི་ཆེད་དུ་དུང་དཀར་གཡས་འཁྱིལ་ཞིག་ཕུལ་ཏེ་གསུང་ལ་འགག་མེད་ཚངས་དབྱངས་དྲུག་ཅུའི་བཀྲ་ཤིས་གསོལ་བ་ནས་བཟུང་དུང་དཀར་འདི་ཉིད་གསུང་ལ་འགག་པ་མེད་པའི་བཀྲ་ཤིས་པའི་མཚོན་རྟགས་ཞིག་ཏུ་གྱུར་པ་ཡིན།

       བུམ་པ།

      བུམ་པ་འཆི་མེད་བདུད་རྩིས་གང་བ་དཔག་བསམ་ཤིང་གི་ཁ་རྒྱན་ཅན་མགུལ་ལ་ཕུལ་བས་བུམ་པ་བཅུད་ཀྱིས་གང་བ་ལྟར་རང་རྒྱུད་ཆོས་ཀྱིས་གང་ནས་གདུལ་བྱའི་རྒྱུད་ཚིམས་པ།

      གཤེན་རབ་དགུང་ལོ་སོ་དྲུག་ཐོག་ལྷ་གནས་ནས་མར་བབས་ཏེ་རི་རབ་ཀྱི་རྩེ་མོར་བྱོན་ཏེ་ ཕྱག་ས་ལ་བརྡབས་པས། ས་ཡི་དབུས་ནས་བཀྲ་ཤིས་ཀྱི་ལྷ་མོ་བུམ་པ་མས་གསེར་གྱི་བུམ་པ་བཅུད་ལྡན་ཞིག་ཕུལ་ཏེ་སྟོན་པའི་མགུལ་ལ་བུམ་པའི་བཀྲ་ཤིས་གསོལ་བས། སྟོན་པའི་སྐུ་ལུས་གསེར་མདངས་སུ་གྱུར་ཏེ་གཡུང་དྲུང་དག་པ་ལྷའི་རྒྱུད་བཤད། དེ་ནས་བུམ་པ་འདི་ཉིད་མགུལ་ལ་འདོད་དགུ་འབྱུང་བའི་བང་མཛོད་ལྟར་བཀྲ་ཤིས་པའི་མཚོན་རྟགས་ཤིག་ཏུ་གྱུར་བ་ཡིན།

       དཔལ་བེའུ།

      རིན་པོ་ཆེ་དཔལ་བེའུ་འཇའ་འོད་ཀྱི་རང་བཞིན་ཅན་ཐུགས་ལ་ཕུལ་བས་སངས་རྒྱས་ཀྱི་མཁྱེན་པ་ཐོག་མཐའ་མེད་པ་གཏིང་དཔག་དཀའ་བའི་སྟོབས་རང་རྒྱུད་ལ་ཐོབ་པ།

      བོན་སྟོན་གཤེན་རབ་མཆོག་དགུང་ལོ་ཞེ་གཉིས་ཐོག་གསས་ཁང་ཁོལ་མ་ནེའུ་ཆུང་དུ་གཡུང་དྲུང་ཁོང་མ་དག་པའི་རྒྱུད་འཆད་སྐབས་ཐུགས་ཉིད་གཡོ་བ་མེད་པ་ཡེ་ཤེས་ལྔ་ཡི་རྣམ་པ་རབ་ཏུ་བཀྲ་བའི་ཚེ། ལྷ་མོ་དཔལ་བེའུ་མས་དཔལ་བེའུ་ཞིག་ཕུལ་ནས་ཐུགས་ལ་གཡོ་བ་མེད་པའི་བཀྲ་ཤིས་གསོལ་བས། དེ་ནས་བཟུང་དཔལ་བེའུ་འདི་ཉིད་ཐུགས་ལ་སྡུག་བསྔལ་དང་གཡོ་འཁྲུལ་མེད་པར་བཀྲ་ཤིས་པའི་མཚོན་རྟགས་ཞིག་ཏུ་གྱུར་པ་ཡིན།

       རྒྱལ་མཚན།

      ལྷ་རྫས་ལས་གྲུབ་པའི་དར་ལྷབ་ལྷུབ་ཀྱིས་གཡོ་བ་རིན་ཐང་དང་བྲལ་བ་བསྟན་པ་མི་ནུབ་པའི་རྒྱལ་མཚན་སྐུ་ལ་ཕུལ་བས་ཕས་ཀྱི་རྒོལ་བ་དང་མི་མཐུན་པའི་ཕྱོགས་ལས་རྒྱལ་ཞིང་སངས་རྒྱས་ཀྱི་སྐུ་དེ་མི་ཕལ་པ་ལས་སུམ་འགྱུར་གྱིས་འཕགས་པ་ཐོབ་པ།

      གཤེན་གྱི་དགུང་ལོ་སོ་བརྒྱད་ཐོག་ཟད་མཚམས་མེ་ཏོག་གླིང་དུ་བདུད་རྗེ་ཁྱབ་པ་ སོགས་རབ་ཏུ་བྱུང་སྟེ་གཡུང་དྲུང་ཕལ་ཆེན་འདུལ་བའི་རྒྱུད་བཤད་ཚེ། ལྷ་མོ་རྒྱལ་མཚན་མས་བདུད་ལས་རྣམ་པར་རྒྱལ་བའི་རྒྱལ་མཚན་བཙུགས་ཏེ། སྐུ་མི་མཐུན་ཕྱོགས་མཐའ་དག་གི་གཡུལ་ལས་རྒྱལ་བའི་བཀྲ་ཤིས་གསོལ་བས། དེ་ནས་རྒྱལ་མཚན་འདི་ཉིད་མི་མཐུན་ཕྱོགས་ལས་རྒྱལ་བའི་བཀྲ་ཤིས་པའི་མཚོན་རྟགས་ཞིག་ཏུ་ཆགས་པ་རེད།

       འཁོར་ལོ།

      སྲིད་པའི་དྲ་བ་ཉོན་མོངས་པའི་རང་བཞིན་རྩད་ནས་གཅོད་པའི་འཁོར་ལོ་ཞབས་ལ་ཕུལ་བའི་ཕ་རོལ་གྱི་རྒོལ་བ་ཐམས་ཅད་ཟིལ་གྱིས་གནོན་དེ་ཐེག་གསུམ་དམ་པའི་ཆོས་ཀྱི་འཁོར་ལོ་ཡོངས་སུ་བསྐོར་བས་གདུལ་བྱའི་རྒྱུད་འདུལ་བ།

      བཀྲ་ཤིས་རྟགས་བརྒྱད་ཀྱི་མཚོན་དོན།

      གདུགས་ནི་དབུ་ཉོན་མོངས་ཀྱི་ཚ་གདུང་སེལ་ཞིང་དུས་གསུམ་རྟག་ཏུ་སྲིད་ཞི་ཀུན་གྱི་བླ་རུ་མཐོ་བའི་བཀྲ་ཤིས་པའི་མཚོན་བྱེད་དང་། གསེར་ཉ་ནི་ཕྱག་རྫུ་འཕྲུལ་ཉམས་ང་མེད་ཅིང་མི་འཇིགས་སྟོབས་དང་ལྡན་པར་བཀྲ་ཤིས་པའི་མཚོན་བྱེད་དང་། པད་མ་ནི་གདན་དྲི་མེད་སྐྱོན་བྲལ་བཀྲ་ལ་གསལ་བར་བཀྲ་ཤིས་པའི་མཚོན་བྱེད། དུང་ཆེན་ནི་གསུང་མ་འགག་ཀུན་གྲགས་ཐོགས་མེད་སྣང་སྲིད་ཟིལ་གྱིས་ནོན་པར་བཀྲ་ཤིས་པའི་མཚོན་བྱེད་དང་། བུམ་པ་ནི་མགུལ་ལ་ཚངས་དབྱངས་དྲུག་ཅུའི་བཅུད་ལྡན་ཤིང་སྙན་པའི་སྒྲ་ཆེན་ཡོངས་ལ་ཁྱབ་པར་བཀྲ་ཤིས་པའི་མཚོན་བྱེད་དང་། དཔལ་བེའུ་ནི་ཐུགས་འཁྲུལ་བ་མེད་པ་སྤངས་རྟོགས་ཕུན་སུམ་ཚོགས་པར་བཀྲ་ཤིས་པའི་མཚོན་བྱེད་དང་། རྒྱལ་མཚན་དེ་སྐུ་ནུབ་པ་མེད་པ་མི་མཐུན་པའི་ཕྱོགས་ལས་རྒྱལ་བའི་བཀྲ་ཤིས་པའི་མཚོན་བྱེད་དང་། འཁོར་ལོ་ནི་ཞབས་རྫུ་འཕྲུལ་ཐོགས་མེད་ཞིང་ཀུན་དབང་བསྒྱུར་བར་བཀྲ་ཤིས་པའི་མཚོན་བྱེད་བཅས་སོ། །

      ཞེས་རོང་ཆེན་ལྷ་རྒྱལ་དཔལ་གྱིས་ཡོངས་འཛིན་འཚོལ་བཤེར་དྲ་བ་ལས་བཏུས་ནས་བསྒྲིགས་སོ།



评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2019-8-19 05:05 , Processed in 0.024667 second(s), 21 queries .

返回顶部