博客西藏在最高处过一种生活

日志

༄༅།།སྐྱབས་རྗེ་བླ་མ་ཚེ་ཏན་ཞབས་དྲུང་མཆོག་ང ...

已有 46 次阅读2018-12-5 09:45 |系统分类:文化


                                       ༄༅།།སྐྱབས་རྗེ་བླ་མ་ཚེ་ཏན་ཞབས་དྲུང་མཆོག་ངོ་སྤྲོད་མདོར་བསྡུས།

                                     རྩོམ་ཁུངས།ཧི་མ་ལ་ཡའི་བོད་ཀྱི་རིག་གནས་འཕྲིན་སྟེགས།

                       
                                             པཎ་ཆེན་སྐུ་ཕྲེང་བཅུ་བ་མཆོག་དང་ལྷན་དུ།


                       

                                               མཁས་དབང་ཚེ་ཏན་ཞབས་དྲུང་མཆོག


                       
                                   དན་ཏིག་ན་བཞུགས་པའི་མཁས་དབང་ཚེ་ཏན་ཞབས་དྲུང་མཆོག་གི་སྐུ་གདུང་།


                       
                    སྐྱབས་རྗེ་བླ་མ་ཚེ་ཏན་ཞབས་དྲུང་ཚང་དང་ཁོང་གི་གཅེས་པར་བསྐྱངས་པའི་ནུབ་བྱང་མི་རིགས་སློབ་གྲྭ་ཆེན་མོའི་སློབ་མ་འགའ།


                       
                                 མཁས་དབང་ཚེ་ཏན་ཞབས་དྲུང་མཆོག་གིས་གསར་བཏོད་མཛད་པའི་དབྱངས་ལྡན་ཡིག་གསར།


                       
                                   མཁས་དབང་ཚེ་ཏན་ཞབས་དྲུང་། དམུ་དགེ་བསམ་གཏན། ཉན་ཤུལ་མཁྱེན་རབ་འོད་གསལ།
                                             དུང་དཀར་བློ་བཟང་ཕྲིན་ལས། གཟན་དཀར་ཐུབ་བསྟན་ཉི་མ།


     མཁས་དབང་ཚེ་ཏན་ཞབས་དྲུང་མཆོག་སྤྱི་ལོ1910ནས1985ལོའི་བར་ཏེ། དེ་ཡང་བཅུ་ཕྲག་རིག་པའི་གཏེར་མཛོད་ཀྱི་ལྡེ་མིག་ཐོགས་པ་མཁས་དབང་རྗེ་འཇིགས་མེད་རིག་པའི་བློ་གྲོས་སམ་ངག་དབང་དབྱངས་ལྡན་རིག་པའི་འདོད་འཇོ་མཆོག་ནི། རྨ་ཀླུང་རིང་མོ་ལྷུང་ལྷུང་བཞུར་བའི་ཉེ་འགྲམ། གཡུ་འབྲུག་སྔོན་མོ་ཐང་ལ་བབས་འདྲའི་ལྷུན་པོ་ཙོང་ཁའི་སྐྱེས་རི་དང་མི་རིང་བའི་ཡུལ་མཚོ་སྔོན་ཞུན་ཧྭ་རྫོང་དུ་འཁྲུངས། ཁོང་མའི་མངལ་ན་ཟླ་གསུམ་གྱི་སྐབས་ཤིག་ལ་པྲ་མཁན་ཞིག་གི་མེ་ལོང་དུ། མའི་ཕྲག་པ་གཡས་པར་འཇའ་ཤར་བ་ཞིག་བབས་པ་དང་།སྟོན་དུས་གཡུལ་གཅོག་པའི་སྐབས། རྒྱ་ཞུར་ཚེ་ཐར་དོན་གྲུབ་ཀྱི་མེས་པོ་སྤོ་བོ་གཅོད་པ་ཚེ་རིང་ཡ་རྫིའི་ཡུལ་བར་ཡོང་སྐབས་ཁྱིམ་དུ་མི་གཅིག་ཀྱང་མེད་པ་ལ་ཁང་བའི་ནང་འཇའ་འོད་ཀྱིས་གང་བ་དངོས་སུ་མཐོང་བ་སོགས་མཚན་མ་མང་བོས་བསུ་མ་བྱས། དེ་ནས་རབ༡༥ཚེས་ལྕགས་ཁྱི་ལོ་སྟེ་སྤྱི་ལོ༡༩༡༠ལོར་ཧོར་ཟླ༤བའི་ཚེས༢༢ཀྱི་མཚན་མོའི་ཐུན་སྟོད་ཀྱི་ཆ་ལ་བཙས་སོ།། བཙས་མ་ཐག་ཨ་མ་ཞེས་འབོད་པའི་སྐད་ཀྱིས་མ་ལ་སྔངས་སྐྲག་དང་ཡ་མཚན་སྐྱེས་པ་དང་། བཙས་སྐབས་བར་སྣང་ལས་འབྲུག་གྲགས་ཤིང་སྤྲང་ཆར་བསིལ་མའི་མེ་ཏོག་འཇོ་བ་སོགས་ཀྱིས་མཚན་བཟང་དུ་མ་བྱུང་། རེབ་གོང་རྙིང་མའི་བླ་མ་བ་ཨ་ལགས་ནམ་མཁའ་ཚང་གིས་མཚན་གྱི་མེ་ཏོག་བློ་བཟང་ཆོས་འཕེལ་དུ་དང་བོར་གཏོར། དགུང་གྲངས་བདུན་ལོན་པའི་དུས་སུ་མཐུ་བ་དགོན་དུ་མ་ཎི་པཎ་ཊི་ཏ་སྐུ་ཕྲེང་ལྔ་བ་དགེ་འདུན་བསྟན་འཛིན་རྒྱལ་མཚན་དང་མཉམ་དུ་བསྙེན་པར་རྫོགས་ཏེ་མཚན་ལ་དགེ་བདུན་བཤད་སྒྲུབ་རྒྱ་མཚོ་གསོལ།
     འདི་ལྟར་དགུང་ལོ་དགུའི་ཐོག་ཏུ་ཕྱག་རྩོམ་གནང་བ་ཡང་། འཛུམ་འཛུམ་རླབས་ཕྲེང་གཡོ་བའི་དོ་ར་ན།། སྐབས་གསུམ་རྫ་རྔ་འཁྲོལ་བའི་གདངས་ལྟར་སྙན།། འོད་དཀར་གཞོན་ནུ་ལས་ཀྱང་དཀར་བའི་མདངས།། ངང་བའི་རྒྱལ་བོ་ཀུན་ལས་རྒྱལ་དེ་མཚར།། ཞེས་དང་། དྷྰིཿཉལ་འགྲོ་གྲེ་འགྱུར་དབྱངས་སུ་གྱེར་བའི་ངོགས།། དཀར་བ་དབྱངས་ལྡན་ཡིན་ནམ་ཐེ་ཚོམ་གྱིས།། བརྟགས་པས་པུཎཊ་རི་ཀའི་འཁྲི་ཤིང་ཞིག།རྐང་དྲུག་ཚོགས་རྣམས་གར་གྱིས་རོལ་བ་སྙམ།། ཞེས་པ་ལྟ་བུའི་མཛད་པ་ཡ་མཚན་པ་མང་པོ་ཡོད། ལྔ་རིག་སྨྲ་བའི་དབང་ཕྱུག་རྗེ་འཇིགས་མེད་དམ་ཆོས་རྒྱ་མཚོའི་དྲུང་ནས་སྒྲ་རིག་པའི་ཡན་ལག་དང་བཅས་པ་ཐམས་ཅད་ཞིབ་ཁྲིད་གནང་བ་ཐོབ་སྟེ་ཀུན་བཤད་ཀྱི་མཚན་གསོལ་བ་འདི་ལྟར། ངག་གི་དབང་ཕྱུག་དབྱངས་ལྡན་རྒྱལ་བའི་ཡུམ།། བྱིན་རླབས་སྙེ་མ་ཁྱོད་ལ་དུད་པ་ལས།། རིག་པའི་གནས་ཀུན་མཐོང་བའི་པཎིཊ་ཏར།། གྲུབ་པས་འགྲོ་ལ་ཕན་བདེའི་འདོད་པ་འཇོ།། ཞེས་ངག་དབང་དབྱངས་ལྡན་རིག་པའི་འདོད་འཇོ་ཞེས་པའི་མཚན་གསོལ་བ་དང་། པཎཊ་ཏ་ཞེས་པའི་ཆོ་ལོ་ཡང་འདི་དུས་ཐོབ་པའི་སྐལ་བཟང་མངོན། རབ་བྱུང་བཅུ་དྲུག་པའི་ཆུ་སྤྲུལ་ལོ་སྟེ། སྤྱི་ལོ༡༩༥༣ལོར་མཚོ་སྔོན་ཞིང་ཆེན་རྩོམ་སྒྱུར་ཨུ་ཡོན་ལྷན་ཁང་གི་འགན་འཁུར་བཞེས་ཤིང་སྒྱུར་རྩོམ་གྱི་ལས་སུ་ཞུགས། ཀྲོའུ་ཙུང་ལི་མཆོག་གིས་ཆོག་མཆན་གནང་བའི་གོ་གནས་ཀྱི་ཡི་གེ་དང་བཅས་མཚོ་སྔོན་ཞིང་ཆེན་མི་དམངས་ཨུ་ཡོན། ལྷན་ཁང་གི་གཞུང་ལས་དབང་གི་ཀྲུའུ་རིན་གཞོན་པར་བཞུགས། ས་ཕག་ལོ་སྟེ་སྤྱི་ལོ༡༩༥༩ནས་ཤིང་འབྲུག་ལོ་སྟེ་སྤྱི་ལོ་༡༩༦༤ལོའི་བར་མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་དུ་བཞུགས་ཏེ་དགེ་སློབ་མང་པོ་ལ་དཔེ་ཁྲིད་གནང་ནས་མི་རིགས་སློབ་གསོ་ལ་མཛད་རྗེས་ཆེན་པོ་བཞག
     ས་རྟ་ལོ་སྤྱི་ལོ༡༩༧༨ལོར་ནུབ་བྱང་མི་རིགས་སློབ་གྲྭ་ཆེན་མོར་ཕེབས་ནས་དགེ་སློང་མང་པོར་རིག་གནས་ལོ་རྒྱུས་སྐོར་གྱི་སློབ་ཁྲིད་རྒྱ་ཆེར་གནང་། དེ་མིན་ཀན་སུའུ་ཞིང་ཆེན་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་། ཀན་སུའུ་ཞིང་ཆེན་སྲིད་གྲོས་ཀྱི་ཨུ་ཡོན་ལྷན་ཁང་གི་ཨུ་ཡོན། ཀྲུང་གོ་མི་རིགས་སྐད་ཡིག་སློབ་ཚོགས་ཀྱི་ལས་འཛིན། རྒྱལ་ཡོངས་སྲིད་གྲོས་ཀྱི་ཨུ་ཡོན། ཀྲུང་གོ་ནང་བསྟན་མཐུན་ཚོགས་ཀྱི་ལས་འཛིན་པ་བཅས་ཀྱི་གོ་གནས་བཞེས་མྱོང་།
     ཁོང་གི་ཕྱག་རྩོམ་ལ་མདོ་སྔགས་གཉིས་ཀྱིས་བསྡུས་པའི་ནང་དོན་རིག་པ་དང་། རྣམ་ཐར། ལོ་རྒྱུས། བསླབ་བྱ། སྐར་རྩིས། སྙན་ངག སུམ་རྟགས་དག་གསུམ། ལཉྫདང་ཝ་རྟུའི་མ་ཕྱི་ལ་སོགས་པ་པོད་ཆེན་པོ་ལྔ་ལས་བརྒལ་བ་ལྔ་ཕྱི་གཉིས་ལ་པར་དུ་བསྐྲུན་ཟིན། རྗེ་འདི་ཉིད་རབ་རྒྱལ་ཤིང་གླང་ལོ་སྟེ་སྤྱི་ལོ༡༩༨༥ལོར་སྒོར་ཁྲི་ཕྲག་དུ་མ་སློབ་གྲྭ་དང་དགོན་པར་འབུལ་རྒྱུའི་ཞལ་ཆེམས་བཞགས་ནས་མདོ་སྨད་ཀྱི་དབུས་གཙང་གཉིས་པ་བླ་བྲང་བཀྲ་ཤིས་འཁྱིལ་དུ་དགོངས་པ་མི་མངོན་པའི་དབྱིངས་སུ་གཏད་དོ།།

      ཞེས་རོང་ཆེན་ལྷ་རྒྱལ་དཔལ་གྱིས་མཚོ་སྔོན་པོ་དྲ་བ་ལས་བཏུསོ།



评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2018-12-12 04:30 , Processed in 0.286826 second(s), 21 queries .

返回顶部