博客西藏在最高处过一种生活

日志

རིག་གནས་ཆེ་བ་ལྔ་ལས་གསོ་བ་རིག་པའི་སྐོར། ...

已有 113 次阅读2019-7-12 13:05 |系统分类:文化| 医方明

རིག་གནས་ཆེ་བ་ལྔ་ལས་གསོ་བ་རིག་པའི་སྐོར།

རིག་གནས་ཆེ་བ་ལྔ་ལས་གསོ་བ་རིག་པའི་སྐོར།


       སྨན་མཆོག་བྱང་ཆུབ་སེམས་ཀྱི་བདུད་རྩི་ཡིས། །དུག་གསུམ་ནད་ཆེན་དྲུངས་ནས་འབྱིན་མཛད་པ། །སྨན་པའི་གཙོ་བོ་དཔལ་ལྡན་བླ་མ་ལ། །བཏུད་ནས་གསོ་རིག་ཇི་ལྟར་བྱུང་བ་བརྗོད། །དེ་ཡང་ཆོས་དང་ནོར་དང་འདོད་པ་ཐམས་ཅད་སྒྲུབ་པའི་རྟེན་གྱི་གཙོ་བོ་མི་ལུས་རིན་པོ་ཆེ་མི་ན་བར་བདེ་བར་གནས་པ་དང་། ན་བ་ལས་གསོ་བར་བྱེད་པ་ཐར་པ་འདོད་མི་འདོད་ཀུན་ལ་མེད་དུ་མི་རུང་བ་ནི་གསོ་བ་རིག་པ་སྟེ། དེ་ཇི་ལྟར་བྱུང་ཚུལ་ལ། ཕྱི་རོལ་པ་ནི། གང་ཕྱིར་ཚངས་པ་ཡི་ནི་ཞལ། །དབུས་མ་ནས་ནི་ཚེའི་རིག་བྱེད། །ཅེས་སོགས་ཀྱིས་སྙན་ཚིག་མཆོད་སྦྱིན་སྲིད་སྲུང་ངེས་བརྗོད་དེ་རིག་བྱེད་བཞི། །བསླབ་པ། བརྡ་སྦྱོར། སྐར་རྩིས། ཐོས་པ། རྟོག་པ་སྟེ་ཡན་ལག་དྲུག་དྲན་པ་དང་ཆོས་ཏེ་ཉེ་བའི་ཡན་ལག་གཉིས་དང་བཅས་ཚངས་པའི་ཞལ་བཞི་ལས་བྱུང་བར་འཆད་དོ། །ཤ་ལི་ཧོ་ཏྲ་སོགས་ལ་སྔོན་རྒྱ་མཚོ་བསྲུབས་པ་ལས་བྱུང་བར་འཆད་པ་ནི་དུས་འཁོར་སོགས་ལས་བཀག་ལ། ཟླ་ཟེར་དུ་ནི། ཡི་གེ་ཨོཾ་དང་ཨ་ཐའི་སྒྲ། །གཉིས་པོ་འདི་དག་སྔོན་ཚངས་པའི། །ཁུར་ཚོས་རྡོལ་ཏེ་མངོན་པར་བྱུང་། །ཞེས་སོགས་དྲངས་སོ། །ཚངས་པས་སྐྱེ་རྒུའི་བདག་པོ་མྱུར་བ། དེས་ཉི་མའི་ཆུང་མ་ཉི་ལྡན་མའི་སྣ་ལས་སྐྱེས་པས་སྣ་སྐྱེས་སམ་ཐ་སྐར་ལ་སྐྱེས་པས་ཐ་སྐར་སྐྱེས་དང་ཀུན་འགྱེད་བུ་སྟེ་ཐ་སྐར་བུ་གཉིས། དེས་བརྒྱ་བྱིན། ཚངས་པས་གསོ་དཔྱད་འབུམ་པ་སོགས་དེ་རྣམས་ཀྱི་གཞུང་སོ་སོར་བྱས། བརྒྱ་བྱིན་ལ་ལྷའི་དྲང་སྲོང་རྒྱུན་ཤེས། འོད་ཟེར་ཅན། འོད་ཡངས། ཡན་ལག་སྐྱེས། ལྷ་མིན་འཇོམས། མཆོན་སྦྱིན་ཅན། གནས་འཇོག་སྟེ་སློབ་མ་གཙུག་ཕུད་ཅན་བདུན་དུ་གྲགས་པ་ཕ་དང་མ་མིའི་བུད་མེད་འདུས་པ་ལས་བུ་བྱུང་བ་ནི་དྲང་སྲོང་རྒྱུན་ཤེས་ཀྱི་བུ(ནབ་སོ་སྐྱེས་ཀྱང་ཟེར)། མེ་བཞིན་འཇུག ཐང་ལ་འབར། །རྐང་གཉིས་སྤྱོད། མུ་ཁྱུད་འཛིན། འགྲོ་སྐྱོང་བུ། གཤོལ་འགྲོ་སྐྱེས་རྣམས་ཀྱིས་བརྒྱ་བྱིན་དང་ཕ་ལས་ཐོས་ཏེ་གཞུང་འགྲེལ་རེ་བྱས་ཤིང་། དེ་ནས་དྲང་སྲོང་ལུག རྒྱ་སྐྱེགས་སྣ། མདའི་མཆོག ལན་ཚྭའི་ལག དཔལ་ལྡན་ཕྲེང་བ། དཔལ་ལྡན་ཕུན་ཚོགས། ཉི་སྙིང་། ཟླ་བའི་འོད་ཟེར་སོགས་ཀྱིས་གཞུང་མང་དུ་བྱས། ཤ་ལི་ཧོ་ཏྲ་དང་། ལེགས་ཐོས། ཛ་ལས་རྒྱལ་སོགས་ཀྱིས་རྒྱས་པར་བྱས་ཏེ་རྡོ་འཇོག་གི་སྨན་པ་རྒྱུན་ཤེས་ཀྱི་བུའི་བར་དུ་བྱུང་ངོ་། །སྤྱིར་འཁོར་ལོས་བསྒྱུར་བའི་གསོ་དཔྱད་ཀྱི་གཞུང་ཡོད་པར་བཤད་དོ། །



    མི་ཡུལ་དུ་དར་ཚུལ་ནི། སྔོན་བཅུད་ཆགས་ནས་རིང་པོ་མ་ལོན་པ་ན་ཤེད་བུ་ཞིག་ས་ཞག་མ་ཞུ་བར་ན་སྟེ་སྨྲེ་སྔགས་འདོན་པ་ན་ཚངས་པས་འོངས་ཏེ་ཆུ་སྐོལ་བཏང་བས་ཞི་སྟེ་ནད་པ་ལ་སྔ་བ་ཤེད་བུ། སྨན་པ་ལ་སྔ་བ་ཚངས་པ། སྨན་ལ་སྔ་བ་ཆུ་སྐོལ་ཞེས་གྲགས་སོ། །སྤྱིར་རིག་པའི་གནས་ཐམས་ཅད་དང་པོར་སངས་རྒྱས་བྱང་སེམས་ཀྱི་མཐུ་ལས་བྱུང་བ་དང་། ཚངས་པའང་བསྐལ་བཟང་གི་སེམས་དཔའ་ཡིན་པས་སངས་རྒྱས་ཀྱི་མཐུ་ལས་བྱུང་བ་ཡིན་ནོ། །སྨན་དཔྱད་ཉིད་ཁོ་ན་བསྟན་པའི་མདོ་རྒྱུད་མེད་མོད་ཀྱང་ཞར་བྱུང་འདུལ་བ་ལས་དགེ་སློང་ནད་པས་སྨན་པ་ལ་དྲིས་ཏེ་བྱའོ་ཞེས་ལུང་སྨན་གྱི་གཞིར་བཤད་པ་དང་། འཚོ་བྱེད་གཞོན་ནུའི་བྱུང་བ་དང་། སྨན་པ་ནད་དང་སྨན་ལ་མཁས་པའི་དཔེས་སངས་རྒྱས་རྒ་ནད་འཆི་བ་སེལ་བར་གསུངས་པ་དང་། གསེར་འོད་དུ་ཆུ་འབེབས་ཀྱི་བྱུང་བའི་སྐབས་སུ། ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས། །གསུམ་ནི་དགུན་ཏེ་གསུམ་ནི་དཔྱིད་ཡིན་ནོ། །དེ་ལྟར་ཟླ་བའི་གོ་རིམ་དུས་ནི་དྲུག །ལོ་གཅིག་ལ་ནི་ཟླ་བ་བཅུ་གཉིས་འདོད། །གསུམ་གསུམ་དུ་ནི་ཚིགས་རྣམས་བསྡུས་པར་ཤེས། །ཟླ་བ་གཉིས་གཉིས་ཀྱིས་ནི་དུས་སུ་བསྟན། །ཟས་དང་སྐོམ་ནི་དེ་ལྟར་འཇུ་བར་འགྱུར། །སྨན་དག་དང་ནི་ཁམས་དང་དུས་ཀྱང་བསྟན། །དབང་བོ་དང་ནི་ཁམས་རྣམས་དེ་དག་ཀྱང་། །ལོ་གཅིག་ནང་ནི་ཚིགས་ཚིགས་ཡོངས་སུ་འགྱུར། །དབང་པོ་དང་ནི་ཡོངས་སུ་འགྱུར་བས་ན། །ལུས་ཅན་རྣམས་ལ་སྣ་ཚོགས་ནད་ཀྱང་འབྱུང་། །དེ་ཉིད་ལ་ནི་སྨན་པས་ཟླ་གསུམ་བཞི། །ཚིགས་ཀྱི་བར་དང་དུས་དྲུག་རྣམས་དང་ནི། །ཁམས་དྲུག་མཁས་པར་བྱ་བ་ཤེས་པར་བྱ། །ཟས་སྐོམ་སྨན་རྣམས་གོ་རིམ་ཇི་བཞིན་ཏེ། །རླུང་གི་ཤས་ཆེའི་ནད་ནི་དབྱར་ན་ལྡང་། སྟོན་ཏུ་གྱུར་པ་ན་ནི་མཁྲིས་པ་གཡོ། །དགུན་གྱི་དུས་སུ་དེ་བཞིན་འདུས་པ་སྟེ། །བད་ཀན་ཤས་ཆེའི་ནད་ནི་དཔྱིད་ལྡང་ངོ་། །དབྱར་ནི་སྣུམ་དྲོ་ལན་ཚ་སྐྱུར་བའི་རོ། །སྟོན་ནི་མངར་དང་སྣུམ་དང་བསིལ་བག་གོ ། དགུན་ནི་མངར་དང་སྐྱུར་དང་སྣུམ་པ་སྟེ། །དཔྱིད་ཀྱི་དུས་ན་རྩུབ་དྲོ་ཚ་པའོ། །བད་ཀན་ཆེ་བ་ཟོས་མ་ཐག་ཏུ་ལྡང་། །མཁྲིས་པ་ཆེ་བ་འཇུ་བའི་དུས་སུ་ལྡང་། །རླུང་ཤས་ཆེ་བ་ཞུ་མ་ཐག་ཏུ་ལྡང་། །ཉེས་གསུམ་གཡོ་བ་དེ་ནི་དེ་ལྟའོ། །རླུང་གི་བདག་ཉིད་ལ་ནི་བཅུད་ཀྱིས་གསོ། །བཀྲུ་སྨན་གྱིས་ནི་མཁྲིས་པ་བསལ་བར་བྱ། །འདུས་པ་ལ་ནི་གསུམ་དང་མཐུན་ལྡན་པ། །བད་ཀན་ཚིགས་བུ་བབ་ན་སྐྱུགས་སྨན་བཏང་། །རླུང་ཤས་ཆེ་བ་མཁྲིས་དང་འདུས་པ་དང་། །བད་ཀན་ཤས་ཆེའི་ཚིགས་རྣམས་ཤེས་པར་བྱ། །དུས་གང་ཁམས་གང་ལུས་ནི་གང་ཡིན་པ། །དེ་ཡི་སྨན་དང་ཟས་སྐོམ་བསྟེན་པར་བྱའོ། །ཞེས་ཤློ་ཀ་དགུ་པོ་འདིས་གསོ་རིག་མཐའ་དག་བསྟན་པ་ཡིན་ཏེ། །ཉི་མ་ཡར་ངོ་ལ་ཟློག་པ་དབྱར་ར་བ་དང་། མར་ངོ་ལ་ཟློག་པ་དབྱར་དགུན་འབྲིང་བོར་བཟུང་བའི་ཟླ་བ་གསུམ་གསུམ་གྱིས་དབྱར་དགུན་སྟོན་དཔྱིད་བཞི། ཡང་དུས་མཚམས་བཞི་ལ་ཞག་བཅོ་བརྒྱད་རེས་ཞག་དོན་གཉིས། །དུས་བཞི་ལ་ཞག་དོན་གཉིས་རེ་སྟེ་ཚིགས་བཅད་ཕྱེད་དང་གཉིས་ཀྱི་དུས་དང་། ཚིགས་བཅད་གཅིག་གིས་གསོ་བྱ་ལུས། ཚིག་རྐང་གཉིས་ཀྱིས་ནད་འབྱུང་བའི་རྒྱུ། ཚིགས་བཅད་གཅིག་གིས་དུས་དང་བསྟུན་དགོས་པ། ཚིགས་བཅད་གཅིག་གིས་དུས་བཞི་ལ་ནད་གང་ལྡང་བ། གཅིག་གིས་དེའི་གཉེན་པོར་ཟས་སྨན་གང་བསྟེན་པ། གཅིག་གིས་ཉེས་གསུམ་ལྡང་བའི་དུས། དེ་ནས་གཅིག་གིས་རླུང་ལ་འཇམ་རྩི་ལས་མི་འདའ། མཁྲིས་པ་སྦྱོངས་ལས་མི་འདའ། བད་ཀན་སྐྱུགས་ལས་མི་འདའ་བ་སྟེ་མི་འདའ་བའི་བཅོས་པ་གསུམ་སྟེ་སེལ་ཐབས། རྐང་པ་གཉིས་ཀྱི་ལྡན་འདུས་ཤེས་དགོས་པ་དང་། གཉིས་ཀྱིས་དོན་བསྡུས་པ་སྟེ་སྨན་གཞུང་མཐའ་དག་འདིར་འདུས་སོ། །གསེར་འོད་ཆེ་བ་རྒྱ་འགྱུར་དུ། །ནད་ཀྱི་གསོ་དཔྱད་ལ་བསྟེན་ནས། །སོགས་དེ་བས་མང་བར་བསྒྱུར། །མྱང་འདས་ཆེན་པོར་རྒྱལ་པོར་ཤེས་རབ་འཆལ་པ་ལ་སྨན་པ་བླུན་པོ་ཡོད་པ་སྨན་པ་མཁས་པས་ཐབས་ཀྱིས་བསྐྲད་པའི་དཔེ་དང་། རྡོ་རྗེ་མཁའ་འགྲོའི་རྒྱུད་ལས། དེ་ནས་སེམས་ཅན་ཀུན་ཕན་ཕྱིར། །ཐམས་ཅད་སྙིང་པོར་བསྡུས་པ་ཡི། །སྒྲུབ་པའི་སྦྱོར་བ་བདུད་རྩི་མཆོག །ཡང་དག་རབ་ཏུ་བཤད་པར་བྱ། །ག་བུར་དང་ནི་གུར་ཀུམ་དང་། །ནས། དེ་ལྟར་རྫས་ནི་བཅོ་བརྒྱད་པོ། །སོགས་དང་། འདས་པའི་དུས་སུ་སྔོན་བྱུང་བ། །བདེ་ཆེན་བསྐལ་པ་དང་པོ་རུ། །སོགས་དང་། དངུལ་ཆུའི་བྱུང་བ་དང་། རོ་དྲུག་གི་སྡེ་ཚན། སྨན་དང་རིན་པོ་ཆེ་རྣམས་ཀྱི་ཕུལ་བཟང་ངན་སོགས་དང་། །ཉེས་གསུམ་ལྡང་བའི་དུས་སོགས་ཀྱི་མཐར། །བྱང་ཆུབ་སེམས་དཔའ་རྣམས་ཀྱིས་སེམས་ཅན་རྣམས་ཀྱི་དོན་དུ་སྦྱར་བར་བྱ་བས་ཕྱི་ནང་གི་སྨན་གྱི་སྦྱོར་པ་འདི་དག་བསླབ་པར་བྱའོ། །སོགས་དང་། དུས་འཁོར་དུ། རླུང་འཇོམས་ལན་ཚྭ་སྐྱུར་པ་དག་ཏུ་རབ་ཏུ་འགྱུར་ཏེ་མངར་དང་སྐ་བ་དག་ནི་མཁྲིས་པའི་དགྲ། །སོགས་དུ་མ་བཤད་དོ། །བསྟན་བཅོས་ནི་ཀླུ་སྒྲུབ་ཞབས་ཀྱིས་སྦྱོར་བ་བརྒྱ་པ་འཚོ་བའི་མདོ་ཚིགས་སུ་བཅད་པ་རྩ་ཨ་ཝའི་ཆོ་ག་དངུལ་ཆུ་རིན་ཆེན་ཕྲེང་བ་གསེར་འགྱུར་སྦྱོར་བ་རྣམས་མཛད། སྔ་རབས་པ་རྣམས་མདོ་ལྔ། དཔྱད་གཞུང་བཅུ་སོགས་མཛད་ཟེར་ཡང་རྒྱ་གཞུང་གི་མཚན་ཉིད་མེད་དོ། །སློབ་དཔོན་དཔའ་བོས་ཡན་ལག་བརྒྱད་པ་ཆེན་པོ། །ཡང་ལག་བརྒྱད་པ་ལ་འཇུག་པ། དེའི་སྙིང་པོ་བསྡུས་པ། ཡན་ལག་བརྒྱད་པ་བསྡུས་པ་སྟེ་བཞི་མཛད། །ཁྱད་པར་སྙིང་པོ་བསྡུས་པ་རྩོམ་པའི་ཚེ། །ས་གསུམ་དགེ་ལེགས་འབྱུང་བ་ཡི། །དགེ་བའི་ལྟས་ནི་སྣ་ཚོགས་བྱུང་། །ཞེས་བཤད། གཞུང་དེ་ལ་རང་འགྲེལ་ཡང་མཛད་དོ། །ཁ་ཆེ་ཟླ་དགའ་ནི་སློབ་དཔོན་གྱི་སྲས་དང་དངོས་སློབ་ཏུ་གྲགས་ཀྱང་སྒྲ་སྦྱོར་ངེས་པར། ཆགས་ལ་མངོན་པར་དགའ་བའི་བུ། །ཟླ་བ་མངོན་དགའ་ཞེས་བྱ་བས། ཞེས་དང་། ཟླ་ཟེར་ལས། བདག་གི་མེས་པོར་གྱུར་པ་ནི། དཔལ་ཆེན་དགེ་བ་ཞེས་གྲགས་ཡིན། །དེ་ནི་ད་ལྟའང་ས་གསུམ་ན། །གྲགས་པ་དྲི་མེད་སྒྲོག་པར་བྱེད། །དེ་སྲས་ཆགས་ལ་མངོན་པར་དགའ། །དེའི་བུ་ཟླ་བ་མངོན་དགའ་བདག །སློབ་དཔོན་བློ་གྲོས་ཆེན་པོ་ནི། །རྒྱུད་ཤེས་དོན་ལྡན་མིང་བཏགས་པ། །


ཡོང་ཁུངས་ཀྲུང་གོ་བོད་ཀྱི་དྲ་བ། 


སྒྲིག་འགོད་ཅུང་ཟད་བཅོས་ཡོད།

(光洽明鉴)

评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2019-8-21 04:34 , Processed in 0.025169 second(s), 21 queries .

返回顶部