博客西藏在最高处过一种生活

日志

གུ་རུའི་མཛད་རྣམ་དང་གཟུངས་མ་མནྡྷ་ར་བས་མཛད ...

已有 12 次阅读2019-6-10 11:06 |系统分类:信仰| 莲师, 祈请文

གུ་རུའི་མཛད་རྣམ་དང་གཟུངས་མ་མནྡྷ་ར་བས་མཛད་པའི་གསོལ་འདེབས།

གཟུངས་མ་མནྡྷ་ར་བས་མཛད་པའི་གུ་རུའི་གསོལ་འདེབས་བཞུགས་སོ༎

ཨེ་མ་ཧོ༔ མཚར་སྡུག་ཡིད་འོང་ཁྱེའུ་ཆུང་སྤྲུལ་པའི་སྐུ༔གསལ་འཚེར་ལྷུན་སྡུག་གཟི་བརྗིད་འབར་བའི་སྐུ༔མཚན་དང་དཔེ་བྱད་མཛེས་པའི་དྲྭ་བ་ལ༔ལྟ་བས་མི་ངོམས་ཨོ་རྒྱན་སྤྲུལ་པའི་སྐུར༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

ཚངས་པའི་གསུང་དབྱངས་རྡོ་རྗེའི་གླུ་དབྱངས་ཀྱིས༔ཟབ་གསལ་ཆོས་ཀྱི་སྒྲ་ལ་དབྱངས་སྙན་པ༔ཉན་པས་མི་ངོམས་ཨོ་རྒྱན་སྤྲུལ་པའི་གསུང་༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

འགྲོ་དྲུག་འཁོར་བའི་གནས་ནས་འདྲེན་མཛད་པའི༔ཐུགས་རྗེ་རྒྱུན་ཆད་མེད་པའི་སྤྱན་སྔ་རུ༔བསྡད་པས་མི་ངོམས་ཨོ་རྒྱན་སྤྲུལ་པའི་ཐུགས༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

སུ་རིང་སུ་རབ་ ༡ ཕ་ཡུལ་བཟང་ན་ཡང་༔གཏན་དུ་མི་རྟག་དྲི་ཟའི་གྲོང་ཁྱེར་འདྲ༔བདག་ཉིད་འཆི་བའི་ནངས་པར་ཕ་ཡུལ་མེད༔གཏན་གྱི་ཕ་ཡུལ་ཨོ་རྒྱན་རིན་པོ་ཆེ༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

རིན་ཆེན་གཞལ་ཡས་ཁང་པ་བཟང་ན་ཡང་༔གཏན་དུ་སྡོད་པའི་དབང་མེད་ཆུ་བུར་འདྲ༔བདག་ཉིད་འཆི་བའི་ནངས་པར་གནས་ཁང་མེད༔གཏན་གྱི་གནས་ཁང་ཨོ་རྒྱན་རིན་པོ་ཆེ༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

ཟས་ནོར་ལོངས་སྤྱོད་ཕུན་སུམ་ཚོགས་ན་ཡང་༔གཏན་དུ་མི་རྟག་རྩྭ་ཁའི་ཟིལ་པ་འདྲ༔བདག་ཉིད་འཆི་བའི་ནངས་པར་འཁྱེར་དབང་མེད༔གཏན་གྱི་ནོར་སྐལ་ཨོ་རྒྱན་རིན་པོ་ཆེ༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

ཕ་དང་ཕུ་བོ་སྤུན་ཟླ་བཟང་ན་ཡང་༔གཏན་དུ་མི་རྟག་ནམ་མཁའི་སྤྲིན་དང་འདྲ༔བདག་ཉིད་འཆི་བའི་ནངས་པར་ཕ་སྤུན་མེད༔གཏན་གྱི་ཕ་སྤུན་ཨོ་རྒྱན་རིན་པོ་ཆེ༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

གྲོགས་སམ་གཏན་གྲོགས་མངའ་ཐང་བཟང་ན་ཡང་༔གཏན་དུ་མི་འཁྱོལ་ངལ་གསོའི་སྟེགས་དང་འདྲ༔བདག་ཉིད་འཆི་བའི་ནངས་པར་སྐྱོ་གྲོགས་མེད༔གཏན་གྱི་སྐྱོ་གྲོགས་ཨོ་རྒྱན་རིན་པོ་ཆེ༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

ཚེ་འདིར་དཔལ་འབྱོར་སྙན་གྲགས་འཛོམས་ན་ཡང་༔གཏན་དུ་མི་རྟག་ནམ་མཁའི་འབྲུག་དང་འདྲ༔བདག་ཉིད་འཆི་བའི་ནངས་པར་སྙན་གྲགས་མེད༔གཏན་གྱི་སྙན་གྲགས་ཨོ་རྒྱན་རིན་པོ་ཆེ༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

ཚེ་འདིར་མཁས་དྲེགས་དབང་ཆེར་ལྡན་ན་ཡང་༔གཏན་དུ་མི་རྟག་ནམ་མཁའི་འབྲུག་དང་འདྲ༔ཤི་ནས་དམྱལ་བར་མཁས་དྲེགས་ངོམས་ས་མེད༔གཏན་གྱི་རྒྱབ་རྟེན་ཨོ་རྒྱན་རིན་པོ་ཆེ༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔
ཚེ་འདིའི་གནས་ལུགས་འཇིག་རྟེན་བྱ་བས་གཡེང་༔ཆགས་སྡང་དབང་གིས་སྡུག་བསྔལ་འདམ་དུ་བྱིང་༔ལས་ངན་བསགས་པས་ལུས་ངན་འདི་འདྲ་བླངས༔ཐུགས་རྗེས་གཟིགས་ཤིག་ཨོ་རྒྱན་རིན་པོ་ཆེ༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

འདི་ནས་བཟུང་སྟེ་ཚེ་རབས་ཐམས་ཅད་དུ༔རིག་འཛིན་ཁྱེད་ཀྱིས་ཐུགས་རྗེས་གཟུང་དུ་གསོལ༔འདྲེན་མཆོག་ཁྱེད་ཀྱིས་ཐུགས་རྗེས་བཟུང་ནས་ཀྱང་༔རྡོ་རྗེའི་ཐེག་པའི་ལམ་མཆོག་བསྟན་དུ་གསོལ༔གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔འཁོར་བའི་སྡུག་བསྔལ་འདི་ལས་བསྒྲལ་དུ་གསོལ༔

འདི་སློབ་དཔོན་ཆེན་པོ་ལ་ལྷ་ལྕམ་མནྡྷ་ར་བས་གདུང་ཤུགས་ཀྱིས་གསོལ་བ་བཏབ་པའོ༎ ༎

མཆན།༡ སུ་རིང་སུ་རབ། བྱང་གཏེར་ཆོས་སྤྱོད་རབ་གསལ་དུ་དེ་ག་རང་ཡིན་ཡང་། པདྨ་གླིང་པའི་གཏེར་མ་ལྷ་ལྕམ་མནྡྷ་ར་བའི་རྣམ་ཐར་དུ། ༼པུ་རན་པུ་རི་༽ ཞེས་བྱུང་། པུ་རན་པུ་རི་ཞེས་པའི་གྲོང་ཁྱེར་དེ་ལྷ་ལྕམ་གྱི་འཁྲུངས་ཡུལ་ཡིན་པར་གསུངས་སོ༎
(藏区佛学园)

评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2019-6-27 12:39 , Processed in 0.024788 second(s), 21 queries .

返回顶部