博客西藏在最高处过一种生活

日志

བོད་ཀྱི་གྲུབ་མཐའ་ཁག་གི་མིང་བྱུང་ཚུལ། ...

已有 52 次阅读2017-10-31 11:08 |系统分类:信仰

བོད་ཀྱི་གྲུབ་མཐའ་ཁག་གི་མིང་བྱུང་ཚུལ།

 དེ་ཡང་སྤྱི་ལོ་༨༤༡ཙམ་ལ་རྒྱལ་པོ་གླང་དར་མའམ་འུ་དུམ་བཙན་པོས་ཆོས་བསྣུབས་ཏེ་ལོ་ངོ་བརྒྱ་དང་སུམ་ཅུ་སོ་དྲུག་འདས་ཤིང་། བཙན་པོའི་གདུང་རབས་ཀྱིས་བོད་སྤྱི་ལ་དབང་བསྒྱུར་བའི་དུས་སྐབས་ཡོལ་ཏེ་བོད་སིལ་བུར་ཐོར། རྗེ་དཔོན་ཚན་པ་བཅུ་གཅིག་གིས་ས་ཁུལ་བཅད་བཟུང་དབང་སྒྱུར་བྱེད་པའི་དུས་སྐབས་ཏེ་སྤྱི་ལོ་༩༧༨ལོར་བླ་ཆེན་དགོངས་པ་རབ་གསལ་གྱི་སློབ་བརྒྱུད་དབུས་གཙང་གི་མཁས་པ་མི་བཅུ་(དབུས་པ་ཀླུ་མེས་ཚུལ་ཁྲིམས་ཤེས་རབ་)གཉལ་པ་འབྲིང་ཡེ་ཤེས་ཡོན་ཏན། སྦ་ཚུལ་ཁྲིམས་བློ་གྲོས། རག་ཤི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློ་གྲོས་དང་ལྔ།གཙང་ནས་ལོ་སྟོན་རྡོ་རྗེ་དབང་ཕྱུག ཤེས་རབ་སེང་གེ། མངའ་རིས་པ་འོ་བརྒྱད་སྤུན་གཉིས། བོ་དོང་བ་ཨུ་པ་དེ་དཀར་བ་དང་ལྔའོ)ཡི་ནང་ཚན་ཀླུ་མེས་ཀྱིས་ཀ་ཆུང་ལྷ་ཁང་བཟུང་། དབུས་སྟོད་ལ་མོར་ཆག་དེའུ་ལྷ་ཁང་བཏབ། དེའི་སློབ་མ་ཞང་སྣ་ནམ་རྡོ་རྗེ་དབང་ཕྱུག་གིས་འཕན་པོ་རྒྱལ་ལྷ་ཁང་བཞེངས། རྔོག་བྱང་ཆུབ་འབྱུང་གནས་ཀྱིས་ཡེར་པར་ལྷ་ཁང་བཞེངས། གླན་ཡེ་ཤེས་ཤེས་རབ་ཀྱིས་རྒྱ་གསར་སྒང་གི་ལྷ་ཁང་བཞེངས།

      རག་ཤི་ཚུལ་ཁྲིམས་འབྱུང་གནས་ཀྱིས་ཐང་པོ་ཆེར་ལྷ་ཁང་བཞེངས། དེ་བཞི་བོ་ལ་ཀླུ་མེས་ཀྱི་སློབ་མ་ཀ་ཆེན་བཞི་ཟེར་རོ། ཁོང་རྣམ་པས་སྔ་རྗེས་སུ་ལྷ་ཁང་བཞེངས་ཏེ་གནས་གཞི་བཟུང་བས་འདུལ་བ་སྨད་འདུལ་གྱི་ལུགས་རབ་བྱུང་གི་སྡེ་གསར་དུ་ཚུགས་སོ། མདོར་ན། རྒྱལ་པོ་གླང་དར་མས་བསྟན་པ་བསྣུབས་རྗེས་སླར་ཡང་བསྟན་པའི་མེ་རོ་སྟོད་སྨད་གཉིས་ལས་ལངས་ཏེ་རིམ་བཞིནདབུས་སུ་གསོས་ཏེ་གཞི་ནང་པ་སངས་རྒྱས་པའི་ཆོས་ལུགས་ཡིན་པ་ལ་ཆོས་རྒྱུད་གྱི་ལྟ་གྲུབ་ཐུན་མོང་མ་ཡིན་པའི་གྲུབ་མཐའ་ཁག་སོ་སོར་བྱུང་བ་རྣམས་ཀྱིས་ཀྱང་རང་རང་གི་རྟེན་གཞི་བཙུགས་ཏེ་ཡུལ་དང་གནས་ཀྱི་མིང་དང་སྦྱར་བའི་ཆོས་ལུགས་ཀྱི་ཚོ་པ་མང་དུ་གྱེས་སོ། 

      གྲུབ་མཐའ་ཞེས་པ་ནི་རང་གི་བློ་ངོར་ལུང་རིགས་ཀྱིས་བསྒྲུབས་ནས་གྲུབ་པར་ཐག་བཅད་པའི་ལྟ་ཚུལ་ལམ་རིགས་པའི་གཞུང་ལུགས་ཤིག་ལ་བྱ་ཞིང་། སྤྱིར་ནང་པའི་གྲུབ་མཐའ་སྨྲ་བ་ནི་བཀའ་བསྡུ་བ་གསུམ་ནས་བཟུང་འགྲོལ་བྱེད་རྣམས་ཀྱིས་འཁོར་ལོ་གསུམ་གྱི་དགོངས་པ་སོ་སོར་བཀྲལ་བ་ལ་བརྟེན་ནས་བྱེ་མདོ་གཉིས་དང་། དབུ་སེམས་གཉིས་དང་བཅས་བཞིར་གྲངས་ངེས་པའོ། ཞེས་གྲགས་ལ། ད་ནི་བྱེ་བྲག་བརྗོད་པའི་བྱ་བའི་གཞི་སྟེ་བོད་ཀྱི་གྲུབ་མཐའ་སོ་སོའི་མིང་བྱུང་ཚུལ་མདོ་ཙམ་བརྗོད་པར་བྱའོ།

ས་སྐྱ་པའི་གྲུབ་མཐའི་མིང་བྱུང་ཚུལ།

དེ་ཡང་ས་སྐྱ་པ་ཞེས་ཡོངས་སུ་གྲགས་པ་ནི་འཁོན་དཀོན་མཆོག་རྒྱལ་པོ་ནས་བྱུང་བ་ཡིན་ལ་སྤྱིར་ས་སྐྱ་ཞེས་པ་དེ་ས་མིང་ཡིན་ཞིང་ས་མིང་དགོན་པར་བཏགས་པ་ཞིག་ཡིཆ་ཅིང་དགོན་པ་དེ་ཆགས་སའི་ས་ཆའི་ཁ་དོག་ལ་བརྟེན་ནས་དགོན་པའི་མིང་ལ་ས་སྐྱ་དགོན་པ་ཟེར།འཁོན་དཀོན་མཆོག་རྒྱལ་པོ་(སྤྱི་ལོ་༡༠༣༤ -༡༡༠༢)ནི་ཐོག་མར་གསང་སྔགས་རྙིང་མ་ལ་མཁས་པར་སྦྱངས་ཤིང་། ཕྱིས་སུ་གསར་མ་ལ་སྦྱངས། རྒྱ་བོད་ཀྱི་བླ་མ་གྲགས་ཅན་མཁུ་པོར་བསྟེན། དབོན་པོ་རི་གླང་པོ་ཆེ་ཉལ་བ་ལྟ་བུའི་མཁལ་ཁུང་གཡས་པའི་ཐད་དུ་ས་དཀར་ཞིང་སྣུམ་པ་དང་། ཆུ་བོ་གཡས་སུ་འབབ་པ་སོགས་ས་བཟང་བར་གཟིགས་ཏེ་དེརེ་བོད་རབ་བྱུང་དང་པོའི་ཆུ་གླང་(སྤྱི་ལོ་༡༠༧༣)ལོར་དགོན་པ་བཏབ་ནས་གནས་གཞི་བཟུང་ཞིང་། འཁོན་གྱི་གདུང་རྒྱུད་ས་ཆེན་ཀུན་དགའ་སྙིང་པོ་སོགས་རིམ་པར་བྱོན་ཏེ་ས་སྐྱ་པའི་གྲུབ་མཐའ་དར་རྒྱས་བྱུང་ལ་མིང་ལ་ས་སྐྱ་པའི་གྲུབ་མཐའ་ཞེས་ཐོགས་པ་ཡིན། ས་སྐྱའི་ཆོས་བརྒྱུད་འཛིན་པའི་དགོན་ཕྲན་ཀྱང་ངོར་ཨེ་ཝཾ་ཆོས་སྡེ། གོང་དཀར་རྡོ་རྗེ་གདན་འཕན་པོ་ནཱ་ལེནྡྲ། རྟ་ནག་ཐུབ་བསྟན་རྣམ་རྒྱལ། སྐྱེད་ཚལ་གོང་འོག་གཉན་ཡད་བྱ་གཤོ ཐུབ་བསྟན་ར་བ་སྨད། རྣམ་རབ་དྭགས་པོ་གྲྭ་ཚང་། བཞད་ཐུབ་བསྟན་ཡང་ཅན། ཆོས་སྐོར་ལྷུན་པོ་ཨ་མདོ་དྷི༔དགོན་སོགས་རྒྱ་ཆེར་དར་རོ།


དགེ་ལུགས་པའི་གྲུབ་མཐའི་མིང་བྱུང་ཚུལ།

 དེ་ཡང་དགེ་ལུགས་པ་ནི་གདན་སའི་མིང་ལ་བརྟེན་ནས་བཏགས་པ་སྟེ། འཇམ་མགོན་བླ་མ་ཙོང་ཁ་པ་ཆེན་པོས་(སྤྱི་ལོ་༡༣༥༧-༡༤༩༡)སྤྱི་ལོ་༡༤༠༩བོད་རབ་བྱུང་བདུན་པའི་ས་གླང་ལོར་དགའ་ལྡན་དགོན་པ་བཏབ་སྟེ་སྐུ་ཚེའི་སྨད་དུ་དེར་བཞུགས་ནས་རྗེའི་རིང་ལུགས་ཆོས་རྗེ་དགའ་ལྡན་པའི་ལུགས་ཞེས་འབོད། དེའི་ཚིག་སྣ་བསྡུས་ནས་བརྗོད་པའི་ཚེ་དགའ་ལུགས་པ་ཞེས་ཟེར་མི་བདེ་བས་དགེ་ལུགས་པ་ཞེས་མིང་དུ་འབོད་པ་རྒྱུན་ཆགས། དེ་ནས་བཟུང་དགེ་ལུགས་པའི་གྲུབ་མཐའ་དར་ཞིང་རྒྱས་པར་གྱུར། 
      འོན་ཀྱང་ཁ་ཅིག་གིས་ནང་པ་སངས་རྒྱས་ཀྱི་ཆོས་ལུགས་ལ་བླ་མའི་ཆོས་ལུགས་དང་། རྙིང་མའི་ཆོས་ལུགས་ལ་དམར་པོའི་ཆོས་ལུགས།བཀའ་བརྒྱུད་པའི་ཆོས་ལུགས་ལ་དཀར་པོའི་ཆོས་ལུགས། ས་སྐྱའི་ཆོས་ལུགས་ལ་ཁྲ་བའི་ཆོས་ལུགས། དགེ་ལུགས་པ་ལ་སེར་པོའི་ཆོས་ལུགས་ཟེར་བ་སོགས་ཤིན་ཏུ་ནས་མི་འཐད་པས་ནོར་འཁྲུལ་གྱི་བརྗོད་སྲོལ་དེ་རིགས་རྒྱུན་འཇགས་སུ་གཏོང་བར་མི་རིགས་ལ། དེ་བཞིན་དུ་བོད་ཀྱི་ཆོས་ལུགས་ལ་བླ་མའི་ཆོས་ལུགས་ཟེར་བ་ནི་དེ་བས་ཀྱང་ཤིན་ཏུ་ནོར་འཁྲུལ་ཆེན་པོ་རེད། ས་དགེ་བཀའ་རྙིང་མཐའ་དག་ནང་པའི་ཆོས་ལུགས་ལས་མ་འདས་པས་ཡུལ་གྱི་ཆ་ནས་བོད་ཀྱི་ནང་པའི་ཆོས་ལུགས་ཟེར་ན་ཆོག་གོ་ཞེས་སྔོན་བྱོན་མཁས་དབང་དག་གིས་གསུངས་ལ་རྙིང་མ་བ་ལས་གཞན་བཀའ་བརྒྱུད་པ་དང་། ས་སྐྱ་པ། དགེ་ལྡན་པ་ཐམས་ཅད་ཀྱི་མདོ་ཕྱོགས་ལས་བརྩམས་པའི་གྲུབ་མཐའི་རྩ་བ་ནི་ཇོ་བོ་ཨ་ཏི་ཤ་ལ་བརྟེན་ནས་དར་བའི་བཀའ་གདམས་པའི་གྲུབ་མཐའ་ལས་སོ་སོར་གྱེས་པ་ཡིན་ཞིང་། དགེ་ལྡན་པ་ལ་བཀའ་གདམས་གསར་མ་བ་ཞེས་པའི་ཐ་སྙད་ཀྱང་འདོགས་པར་མཛད་དོ། དེ་ཡང་གྲུབ་མཐའ་སོ་སོར་འབྱེད་པའི་གནད་དམ་པ་ནི་རྒྱ་གར་དང་བོད་ཀྱི་གྲུབ་མཐའ་གང་ཡིན་ཡང་ལྟ་བའི་སྒོ་ནས་ཐ་དད་པར་བཞག་པ་མ་གཏོགས་ཞྭ་གོས་ཀྱི་ཁ་དོག་སོགས་ལ་བལྟས་ནས་བཞག་པ་ཞིག་གཏན་ནས་མིན་པ་མངོན་སུམ་ཚད་མས་གྲུབ་པ་མཁས་དབང་ཚེ་ཏན་ཞབས་དྲུང་སོགས་ཀྱིས་གསུངས་པ་ནི་ཐུགས་ཤིན་ཏུ་ནས་མད་པའི་གཏམ་ཡིན་ནོ།

བཀའ་བརྒྱུད་པའི་གྲུབ་མཐའི་མིང་བྱུང་ཚུལ།

 དེ་ནི་བཀའ་བབས་ཀྱི་གདམས་པའི་རྒྱུད་འཛིན་པ་ཡིན་པས་བཀའ་བརྒྱུད་པ་ཞེས་གྲགས་ལ་དབྱེ་ན་གཉིས་ཏེ། ཤངས་པ་བཀའ་བརྒྱུད་དང་། དྭགས་པོ་བཀའ་བརྒྱུད་དོ། དེ་ལས་ཤངས་པ་བཀའ་བརྒྱུད་ནི་མཁས་གྲུབ་ཁྱུང་པོ་ལས་བརྒྱུད་དེ་སངས་རྒྱས་སྟོན་པའི་བར་བརྒྱུད་པ་རིན་ཆེན་བདུན་བརྒྱུད་ཟེར་ལ་དེ་ནས་བརྒྱུད་པའི་ཤངས་སྟོན་གྱི་བརྒྱུད་ལ་ཤངས་པ་བཀའ་བརྒྱུད་ཅེས་བྱ་ཞིང་། བཞུགས་ཡུལ་ཤངས་ཕྱོགས་ཡིན་པས་ཤངས་པ་བཀའ་བརྒྱུད་ཀྱང་ཟེར། ཕྱིས་ཀྱི་གྲུབ་ཐོབ་ཐང་སྟོང་རྒྱལ་པོ་ཡང་ཤངས་པའི་ཆོས་བརྒྱུད་འཛིན་པ་ཞིག་ཡིན་པས་ལྕགས་ཟམ་ཕྱོགས་སུ་ཞང་ཤངས་ཆོས་དར་བར་སྣང་ངོ་ཞེས་གྲགས། 

རྙིང་མ་བའི་གྲུབ་མཐའི་མིང་བྱུང་ཚུལ།

  དེའི་སྐོར་གོང་དུ་གསང་སྔགས་གསར་འགྱུར་དང་། རྙིང་འགྱུར་གཉིས་ཀྱི་ཁྱད་པར་ངོས་འཛིན་བྱེད་པའི་སྐབས་སུ་མདོ་ཙམ་བརྗོད་ཟིན་ཀྱང་། འདིར་ས་བཅད་མ་སྟོང་བའི་ཚུལ་དུ་ཅུང་ཟད་བརྗོད་ན། རྙིང་མ་བ་ཞེས་པ་ནི་བསྟན་པ་སྔ་དར་གྱི་དུས་སུ་ལོ་ཙཱ་བ་བེ་རོ་ཙ་ན་སོགས་ཀྱིས་བསྒྱུར་བའི་རྒྱུད་སྡེ་ལ་གསང་སྔགས་རྙིང་མ་ཞེས་ཟེར་ལ། འདི་ནི་སློབ་དཔོན་པདྨ་འབྱུང་གནས་རྩ་བའི་སློབ་དཔོན་དུ་འཛིན་པ་དང་། དེས་གསུངས་པའི་རྒྱུད་སྡེ་ཡི་དོན་རྣམས་ཉམས་སུ་ལེན་མཁན་ལ་ངོས་འཛིན་དགོས། རྙིང་མའི་དགོན་པར་སྔ་བ་ཤངས་ཐུབ་ཆེན་དགོན།ཀ་དམ་པ་བདེ་གཤེགས་ཀྱིས་བཏབ་པའི་སྡེ་དགེ་ཀ་ཐོག་དགོན། སྤྱི་ལོ༡༦༡༨ལོར་གཏེར་བདག་གླིང་པ་འགྱུར་མེད་རྡོ་རྗེས་བཏབ་པའི་གྲྭ་ཕྱི་སྨིན་གྲོལ་གླིང་གི་དགོན། སྤྱི་ལོ་༡༦༠༠སྐོར་ལ་རིག་འཛིན་ངག་གི་དབང་པོས་བཏབ་པའི་ཐུབ་བསྟན་རྡོ་རྗེ་བྲག་གི་དགོན་སོགས་ཡོད། བཀའ་གདམས་པའི་གྲུབ་མཐའི་མིང་བྱུང་ཚུལ།

ཀའ་གདམས་པའི་གྲུབ་མཐའི་མིང་བྱུང་ཚུལ།

དེ་ནི་རྒྱལ་བའི་བཀའ་སྡེ་སྣོད་གསུམ་གྱི་དོན་ཐམས་ཅད་མ་ལུས་པར་རང་གིས་ཉམས་སུ་བླང་བྱའི་གདམས་ངག་ཏུ་གོ་བས་ན། བཀའ་གདམས་པ་ཞེས་བརྗོད་ལ། དེ་ཡང་བོད་རབ་བྱུང་དང་པོའི་ལྕགས་འབྲུག་སྤྱི་ལོ་༡༠༤༠ལོར་ལྷ་བླ་མ་བྱང་ཆུབ་འོད་ཀྱིས་ཇོ་བོ་རྗེ་དཔལ་ལྡན་ཨ་ཏི་ཤ་(སྤྱི་ལོ་༩༨༢-༡༠༨༤)བོད་དུ་གདན་དྲངས་ནས་མངའ་རིས་དང་། ཡེར་པ། སྙེ་ཐང་། འཕན་པོ། ལྷ་ས་བཅས་སུ་ལོ་ངོ་བཅུ་བདུན་གྱི་རིང་ལ་ཆོས་གསུངས་པ་དང་། བསྒྱུར་པ། སྒྱུར་བཅོས་སོགས་ཀྱིས་སློབ་མ་མང་དུ་བསྐྱངས། སློབ་མའི་མཆོག་འབྲོམ་སྟོན་རྒྱལ་བའི་འབྱུང་གནས་(སྤྱི་ལོ་༡༠༠༤-༡༠༡༤)ཀྱིས་རབ་བྱུང་དང་པོའི་མེ་བྱ་སྤྱི་ལོ་༡༠༨༧ལོར་རྭ་སྒྲེང་དགོན་པ་བཏབ་ང་དང་དེ་ནས་དར་སྤེལ་བྱུང་བའི་ཆོས་བརྒྱུད་ལ་བཀའ་གདམས་པ་ཞེས་བརྗོད་ཅིང་ཇོ་བོ་རྗེས་དབུ་བརྙེས་པ་དང་འབྲོམ་སྟོན་པས་སྲོལ་གཏོད་སྐུ་མཆེད་གསུམ་གྱིས་རྒྱས་པར་མཛད་པའི་རྒྱལ་བའི་བཀའ་ན་གཅིག་ཀྱང་དོར་དུ་མེད་པར་གང་ཟག་གཅིག་གི་འཚང་རྒྱ་བའི་གདམས་ངག་ཏུ་གོ་བའི་ཆ་ནས་བཀའ་གདམས་པ་ཞེས་བྱའོ།    དེ་ཡང་མདོར་བསྡུས་ན་བཀའ་བརྒྱུད་དང་ ས་སྐྱ་པ) དགེ་ལུགས་པ་རྣམས་ཀྱང་མཉམ་མེད་ཇོ་བོ་རྗེ་ཉིད་ཀྱི་འཕྲིན་ལས་ལ་བརྟེན་ནས་བྱུང་བ་ཤ་སྟག་ཡིན་པ་མ་ཟད་རྒྱལ་བ་ཙོང་ཁ་པ་ནི་ཇོ་བོ་རྗེ་དང་། རྗེ་དང་ཐུགས་རྒྱུད་གཅིག་པར་ཚད་མའི་ལུང་གིས་གྲུབ་ལ་ཇོ་བོ་རྗེའི་དགོངས་པ་དང་གཞི་གཅིག་ཏུ་མཐུན་པས་ཆོས་འབྱུང་ཁ་ཤས་སུ་དགེ་ལུགས་པར་བཀའ་གདམས་གསར་མའི་ཐ་སྙད་ཀྱང་འདོགས་པ་གནང་ཡོད་ཅེས་གསུངས་ལ་མཁས་དབང་ཚེ་ཏན་ཞབས་དྲུང་ལགས་ཀྱིས་ཀྱང་༼གསང་སྔགས་གསར་མ་ནི་ས་སྐྱ་པ་དང་། བཀའ་

བརྒྱུད་པ་ནས་བཟུང་དགེ་ལྡན་པ་ལ་ཐུག་གི་བར་གྱི་གྲུབ་མཐའ་འཛིན་པ་ཐམས་ཅད་ལ་ཟེར། འོན་ཀྱང་བཀའ་གདམས་པ་ནི་མདོ་ཕྱོགས་རྩལ་དུ་འདོན་པ་ལས་གསང་སྔགས་མངོན་ཆེར་མི་

མཛད་པས་ན་བཀའ་གདམས་པ་ལ་ཡང་གསང་སྔགས་གསར་མ་ཞེས་པའི་མིང་མངོན་མཚན་དུ་མི་འདོགས་སོ།༽ ཞེས་གསུངས།

ཞི་བྱེད་པའི་གྲུབ་མཐའི་མིང་བྱུང་ཚུལ།

དེ་ཡང་ཞི་བྱེད་པའི་གྲུབ་མཐའ་ནི་རྒྱ་གར་གྱི་གྲུབ་ཆེན་པ་དམ་པ་སངས་རྒྱས་ (སྤྱི་ལོ་༡༡༡༧)ནས་དར་བ་ཡིན་ཞིང་། ཤེར་ཕྱིན་ཉམས་ལེན་གྱིས་སྲིད་ཞིའི་སྡུག་བསྔལ་ཐམས་ཅད་ཞི་བར་བྱེད་ལ་གདམས་པ་འདིའི་སྙིང་པོ་ཡང་ཤེར་ཕྱིན་གྱི་ཉམས་ལེན་ཡིན་པའི་ཆ་ནས་དང་། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པ་ལ་བརྟེན་ནས་ཞི་བྱེད་པའི་གྲུབ་མཐའ་ཞེས་མིང་དུ་བཏགས། ཞི་བྱེད་པའི་ཆོས་སྡེ་གྲགས་ཆེ་བ་ནི་སྐྱེས་མཆོག་བསམ་གཏན་དཔལ་གྱིས་བཏབ་པའི་ཡབ་ཆོས་སྡིངས་དང་། སྒོ་མོ་ཆོས་སྡིངས་གཉིས་སོ། དེ་ནི་ཆོས་རྗེ་དོན་གྲུབ་རིན་ཆེན་གྱི་བླ་མ་ཡིན།ཞི་བྱེད་པའི་ཡ་གྱལ་གཅོད་ཀྱི་གདམས་པ་ཡང་དམ་པ་སངས་རྒྱས་ཀྱིས་སྤེལ་བ་ཡིན་ལ་དེ་ཡང་གཅོད་ཅེས་བྱ་བའི་སྒྲ་དོན་ནི་གདམས་པའི་བྱེད་ལས་ཀྱི་སྒོ་ནས་བཏགས་པ་སྟེ་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་རང་དོན་ཡིད་བྱེད་གཅོད། སྟོང་ཉིད་ཀྱི་ལྟ་བས་འཁོར་བའི་རྩ་བ་གཅོད།ཐུན་མོང་གིས་བདུད་བཞི་གཅོད་པས་དེ་སྐད་དུ་བཏགས་ལ་ཡང་ན་སྤྱོད་ཅེས་ཀྱང་བྱ་སྟེ། རྒྱལ་བའི་སྲས་ཀྱི་ཉམས་ལེན་ཐབས་ཤེས་ཀྱི་ལམ་ལ་སྤྱོད་པས་དེ་ལྟར་དུ་གྲགས། 

ཞ་ལུ་བུ་སྟོན་པའི་གྲུབ་མཐའི་མིང་བྱུང་ཚུལ།

  དེ་ཡང་རྗེ་བཙུན་ཤེས་རབ་འབྱུང་གནས་ཀྱིས་སྤྱི་ལོ་༡༠༢༧བོད་མེ་ཡོས་ལོར་ཁུ་ལུ་གསེར་ཁང་བཏབ། ཇོ་བོ་རྗེས་རབ་གནས་མཛད་ཅིང་མཁན་ཐོག་རིམ་པས་བཟུང་རྗེས་ཞ་ལུ་ཀོ་ཤམ་གྲགས་པ་རྒྱལ་མཚན་གྱིས་ཁྲོ་ཕུ་ནས་ཀུན་མཁྱེན་བུ་སྟོན་རིན་པོ་ཆེ་ཞ་ལུ་ཆོས་སྡེར་གདན་དྲངས། བུ་སྟོན་རིན་ཆེན་གྲུབ་(སྤྱི་ལོ་༡༢༩༠ -༡༣༦༤)ཀྱིས་རྒྱུད་སྡེ་བཞིའི་སྒྲུབ་མཆོད་སོགས་བཙུགས་ནས་རྒྱུད་སྡེ་བཞིའི་དབང་དང་རྒྱུད་ཀྱི་བཤད་པ་མན་ངག་དང་བཅས་པའི་འཆད་ཉན་ཡུན་རིང་མཛད། དུས་འཁོར་དང་རྡོར་དབྱིངས་སོགས་རྣལ་འབྱོར་རྒྱུད་ཀྱི་དཀྱིལ་འཁོར་བདུན་ཅུ་ལྷག་ཙམ་བཙུགས། སློབ་མ་ཤིན་ཏུ་མང་། གོང་གསུམ་པ་ཆོས་ཀྱི་དཔལ་བ་དང་། ཁྱུང་པོ་ལྷས་པ་རྣམས་ལས་རྒྱལ་བ་ཙོང་ཁ་པས་བུ་ལུགས་ཀྱི་དབང་གསན། བཀའ་བསྟན་ལ་དག་ཐེར་མཛད་དེ་དཀར་ཆག་ཏུ་བཏབ་པ་སོགས་ཀྱིས་མཚོན་མཛད་རྗེས་བསམ་གྱིས་མི་ཁྱབ།མདོར་ན་ས་དགེ་བཀའ་བརྒྱུད་གྲུབ་མཐའ་ཐམས་ཅད་ལ་རྗེ་འདི་ལས་བརྒྱུད་པའི་མན་ངག་གིས་ཁྱབ་པར་གྲགས་སོ། 

ཇོ་ནང་པའི་གྲུབ་མཐའི་མིང་བྱུང་ཚུལ།

  ཇོ་ནང་པའི་གྲུབ་མཐའ་ནི། རྩ་བ་ཡུ་མོ་མི་བསྐྱོད་རྔོ་རྗེ་སྟེ། དང་པོ་རྣལ་འབྱོར་བ། ཕྱིས་སུ་རབ་ཏུ་བྱུང་ནས་མཚན་དད་པ་རྒྱལ་པོ་ཞེས་པ་ལས་བརྒྱུད། ཀུན་མཁྱེན་ཆོས་སྐུ་འོད་ཟེར་གྱི་སློབ་མ་ཀུན་སྤངས་ཐུགས་རྗེ་བརྩོན་འགྲུས་ཀྱིས་ཇོ་མོ་ནང་དུ་དགོན་པ་བཏབ། ཀུན་མཁྱེན་དོལ་བུ་བ་ཤེས་རབ་རྒྱལ་མཚན་(སྤྱི་ལོ་༡༢༩༢ -༡༣༦༡)དེར་བཞུགས་ནས་སྐུ་འབུམ་མཐོང་གྲོལ་ཆེན་མོ་བཞེངས། མདོ་སྔགས་ཀྱི་གཞུང་བཤད་གནང་ཞིང་གྲུབ་མཐའ་དེ་རྒྱ་ཆེར་སྤེལ། དེ་ནས་བཟུང་བརྒྱུད་འཛིན་པ་རྣམས་ལ་ཇོ་ནང་པ་ཞེས་གྲགས། 




评论 (0 个评论)

facelist doodle 涂鸦板

您需要登录后才可以评论 登录 | 注册

藏网首页|关于我们|团队组成|大事记|网站地图|广告服务|联系我们|小黑屋|Archiver|

tibetcul.com © Copyright 2004-2017. All rights reserved |陇ICP备05000171号

战略合作伙伴:雪域数码图书馆(The Tibetan & Himalayan Library)|法律顾问:珠穆朗玛律师事务所

严禁在本站发表与国家法律相抵触言论和散播谣言

Powered by Discuz! X3.2GMT+8, 2017-11-22 19:03 , Processed in 0.271770 second(s), 21 queries .

返回顶部